SUMQAYIT SAKİNİNİN AİLƏSİNDƏ ÜÇ EKİZ DÜNYAYA GƏLMİŞDİR
Sumqayıt sakini Şəmsəddin Umudovun ailəsində bayramdır. Bu ailədə üç ekiz övlad dünyaya gəlmişdir. AZƏRTAC-ın müxbiri xəbər verir ki, şəhər icra hakimiyyəti başçısının müavini Ramiz Həsənov, səhiyyə şöbəsinin müdiri Rauf Sadıqov və başqaları mayın 9-da Umudovlar ailəsinin sevincinə şərik olmaq üçün onlara qonaq gəlmişlər.
Qonaqları ailənin ilki, 9 yaşlı Müseyib qarşılamışdır. İndi onun iki bacısı və bir qardaşı var. Ailənin xanımı Leyla demişdir ki, onlar uşaqlara Heydər, Zərifə və Mehriban adlarını vermişlər. Övladlarının iki böyük şəxsiyyətin şanlı yubileylərinin qeyd olunduğu günlərində doğulmasına çox sevindiyini vurğulayan Leyla xanım əmin olduğunu bildirmişdir ki, həyat yoldaşı ilə birlikdə fiziki və mənəvi cəhətdən sağlam, cəmiyyət üçün faydalı övladlar böyüdəcəklər.
Respublika Prezidenti İlham Əliyevin adından ailəyə paltaryuyan maşın, televizor, uşaq çarpayısı və digər əşyalar hədiyyə edilmişdir.
Valideynlər onların ailəsinə göstərdiyi qayğıya görə ölkə Prezidentinə minnətdarlıqlarını bildirmişlər.
######
Bölmənin digər xəbərləri
