SUMQAYIT YAXINLIĞINDA “YENİ YAŞMA” SƏNAYE ŞƏHƏRCİYİ SALINIR
Sənaye şəhərciyi Sumqayıtın 22 kilometrliyində, 9 hektar sahədə inşa olunacaqdır. Gələcəkdə onun sahəsi 300 hektaradək genişləndiriləcəkdir. Burada 10-12 min yeni iş yerinin açılması planlaşdırılır.
Şəhərcikdə müasir infrastruktur, sənaye müəssisələrinin fəaliyyət qabiliyyətini təmin edən yeni texnologiyalar yaradılacaqdır. Kommunal xidmətləri haqqının, habelə gömrük, vergi və sair rüsumların ödənilməsinin güzəştli formaları, sənaye istehsalının və sahibkarlıq təşəbbüsünün inkişafını stimullaşdıran mühitin yaradılması nəzərdə tutulur.
İqtisadi İnkişaf Nazirliyindən bildirmişlər ki, şəhərciyin tikintisi BMT yanında Sənayenin İnkişafı Proqramı (UNİDO) ilə birlikdə həyata keçirilir. Layihəni texniki-iqtisadi baxımdan Türkiyənin “İnam” fondu əsaslandırır. UNİDO-nun xətti ilə şəhərciyin infrastrukturunun tikintisinə 30 milyon dollar xərclənəcəkdir. Marketinq tədqiqatlarını Almaniyanın Texniki Yardım Cəmiyyəti (GTZ) aparmışdır.
Hazırda həmin layihənin dövlət büdcəsindən maliyyələşdirilməsi məsələsi müzakirə olunur. Sonra İqtisadi İnkişaf Nazirliyi “Yeni Yaşma” sənaye şəhərciyinin tikintisinə başlayacaqdır.
Bölmənin digər xəbərləri
