CƏMİYYƏT
Sumqayıtda ruhi xəstələrin vahid uçotu elektron qaydada aparılacaqdır
Bakı, 5 iyun AZƏRTAC). Sumqayıt Şəhər Ruhi-Əsəb Xəstəlikləri Dispanserində xəstələrin vahid uçotu elektron qaydada aparılacaqdır.
Səhiyyə Nazirliyindən AZƏRTAC-a bildirmişlər ki, bununla əlaqədar dispanser artıq beş ədəd kompüterlə təmin olunmuşdur.
Ombudsmanın Milli Preventiv Qrupunun üzvləri bu günlərdə dispanserin bütün obyektlərinə baxış keçirmişlər. Baxış zamanı müəssisədə tibbi xidmət, qidalanma və xəstələrə qarşı rəftarla bağlı pozuntu müşahidə olunmamışdır.
Dispanserdə stasionar və ambulator müalicəsi aparılan xəstələrin dərman preparatları, həmçinin tibbi ləvazimatlarla, gigiyenik vasitələrlə kifayət qədər təmin olunduğu müəyyənləşdirilmişdir.