SUMQAYITIN YAY DÜŞƏRGƏLƏRİNDƏ UŞAQLARIN İSTİRAHƏTİ BAŞA ÇATMIŞDIR
AZƏRTAC-ın müxbiri xəbər verir ki, Sumqayıtda şəhər tipli uşaq istirahət düşərgələrinin fəaliyyəti başa çatmışdır. Artıq beşinci mövsümdür ki, şəhərdə icra hakimiyyətinin təşəbbüsü ilə yaradılmış düşərgələr fəaliyyət göstərir və burada əsasən aztəminatlı ailələrdən olan uşaqlar dincəlirlər.
Şəhər təhsil şöbəsinin müdiri Vidadi Bağırovun sözlərinə görə, düşərgələr yay tətili günlərində uşaqların asudə vaxtının səmərəli təşkilinə kömək edir. 2003-cü ildə düşərgələr şəhərin yalnız altı təhsil müəssisəsində fəaliyyət göstərirdisə, ötən ildən bütün orta məktəblərdə açılmışdır.
Bu il 2 mindən çox məktəbli yay tətilini şəhər tipli düşərgələrdə keçirmişdir. Təsdiq edilmiş tədbirlər planına müvafiq olaraq idmanla məşğul olmaq, yaradıcılıq vərdişlərini inkişaf etdirmək üçün hər bir düşərgədə şərait yaradılmış, Bakıya və yaxın bölgələrə gəzintilər təşkil olunmuşdur.
Uşaqlar bazar günlərindən başqa hər gün saat 9-dan 13-dək 134 nəfər təcrübəli tərbiyəçinin nəzarəti altında olmuş, onlar üçün səhər yeməkləri verilmişdir.
Bölmənin digər xəbərləri
