Suraxanı rayonunda əhalinin tibbi müayinəsi uğurla davam edir
Bakı, 2 aprel (AZƏRTAC, Elçin Hüseynov). Prezident İlham Əliyevin fevralın 17-dən mayın 1-dək bütün ölkə vətəndaşlarının icbarı tibbi müayinədən keçirilməsi ilə bağlı tapşırığı Suraxanı rayonunda böyük ruh yüksəkliyi ilə icra olunur.
Tibbi müayinələrin yüksək səviyyədə təşkil edilməsi üçün rayon icra hakimiyyətində yaradılmış komissiya təbliğat-təşviqat işlərini davam etdirir. Aparılan araşdırmalar deməyə əsas verir ki, tibbi müayinədən rayon əhalisi çox razıdır. Bu tədbirin həyata keçirilməsi dövlət başçısının vətəndaşlara göstərdiyi diqqət və qayğının nəticəsidir.
Suraxanı Rayon İcra Hakimiyyəti başçısının müavini Sevinc Hüseynova AZƏRTAC bildirmişdir ki, sakinlərin dispanterizasiyası 4 xəstəxana, 4 poliklinika və 1 ambulatoriyada aparılır. Rayon icra hakimiyyəti başçısının inzibati ərazi dairəsi üzrə nümayəndəlikləri, qəsəbə bələdiyyələri əhali arasında planlı formada maarifləndirici tədbirlər aparırlar. Görülən işlərin nəticəsidir ki, rayon əhalisinin tibbi müayinəsi uğurla davam edir, hər bir vətəndaş yaşadığı əraziyə yaxın olan tibb müəssisəsində tibbi müayinədən keçirilir. İndiyədək Suraxanı rayonunda 90 minə yaxın vətəndaş tibbi müayinədən keçmişdir. Onlardan 2335 nəfərdə müxtəlif xəstəliklər aşkarlanmış, 182 nəfər stasionar müalicəyə cəlb olunmuşdur.
15 nömrəli birləşmiş şəhər xəstəxanasının baş həkimi Arif Məmmədov demişdir ki, rəhbərlik etdiyi müəssisə “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqranı”nın icrasına uyğun olaraq əsaslı təmir olunmuş və ən müasir avadanlıqlarla təchiz edilmişdir. O bildirmişdir ki, xəstəxanaya gələn vətəndaşlar ümumi və biokimyəvi, rentgen, ultrasəs və digər müayinələrdən keçirlər. Bu günədək 13650 nəfər tibbi müayinədən keçmişdir. Onlardan 979 nəfəri rentgen, 2254 nəfəri laboratoriya müayinəsindən, 479 nəfəri USM aparatından və 377 nəfəri isə EKQ müayinəsindən keçmişdir. Müayinədən keçənlərin 159 nəfərində müxtəlif xəstəliklər aşkarlanmış, 39 nəfəri isə stasionar müalicəyə götürülmüşdür. Xəstəlik aşkar edilən şəxslərin müalicəsi istiqamətində də işlər görülür. Eyni zamanda, müəssisəmizdə işləyən həkimlərdən ibarət səyyar briqadalar yaradılmışdır. Bu briqadalar məktəblərdə, uşaq bağçalarında və poliklinikaya gələ bilməyən yaşlı insanlara evlərində tibbi xidmət göstərirlər. Aşkara çıxarılan xəstəliklər üzrə müalicə kursları təyin edilir.
Xəstəxananın tibbi heyətindən, burada yaradılan şəraitdən razılığını bildirən Qaraçuxur qəsəbəsinin sakini Əliağa Hüseynov vurğulamışdır ki, bu aksiya ölkə başçısı İlham Əliyevin hər bir Azərbaycan vətəndaşının Prezidenti olduğunu bir daha sübut edir. Aparılan kütləvi tibbi müayinələrin insanların sağlamlığı üçün olduqca böyük əhəmiyyəti vardır. Belə müayinələr insanlar arasında bir sıra xəstəlikləri erkən aşkar etməyə, vaxtında və dəqiq müalicə aparmağa imkan yaradır. Dövlət başçısının vətəndaşların pulsuz tibbi müayinədən keçirilməsi ilə bağlı tapşırığı xəstəliklərin profilaktikası istiqamətində atılan uğurlu addımlardandır.
Qəsəbə sakini Cəmilə Həsənova demişdir: “Bütün müayinələrdən keçdim. Həkimlər və tibb bacıları məni mehribanlıqla qarşıladılar. Belə şəraiti bizə yaratdığına görə dövlətimizin başçısına minnətdarlığımızı bildiririk”.
Bölmənin digər xəbərləri
