Suraxanı rayonunda içməli sudan qanunsuz istifadə halları aşkarlanıb
Bakı, 22 dekabr, AZƏRTAC
İçməli sudan qanunsuz istifadə hallarının aşkarlanması və aradan qaldırılması məqsədilə “Azərsu” ASC tərəfindən yaradılmış xüsusi qrupların araşdırmaları nəticəsində Suraxanı rayonunda sudan uçotsuz və sayğacdankənar xətlərdən istifadə halları aşkarlanıb.
ASC-dən AZƏRTAC-a bildirilib ki, Hövsan qəsəbəsi Oqtay Şabanov küçəsində yerləşən obyektdə içməli sudan qeyri-qanuni istifadə edildiyi məlum olub. Belə ki, obyektdə 4 mağaza - “Gəncə təndiri” çörək sexi, ət kəsimi məntəqəsi, “Al” və “Oba” marketlər fəaliyyət göstərir. Bu obyektlərin su təchizatı şəbəkəyə qanunsuz qoşulmuş xətt vasitəsilə aparılıb. Əmircan qəsəbəsi Atamoğlan Rzayev küçəsindəki qum bazarında da analoji vəziyyət hökm sürür. Bu obyektdə də su təchizatının qanunsuz çəkilmiş xətt vasitəsilə aparıldığı aşkarlanıb. Yeni Günəşli qəsəbəsi AB 98 ünvanında yerləşən qaraj isə ət kəsimi sexi kimi fəaliyyət göstərib. Bu obyekt abonent kimi qeydiyyata alınmayıb və indiyədək içməli sudan qanunsuz istifadə edib.
Suraxanı rayonunda bir neçə fərdi həyət evinin sudan qanunsuz istifadə etdiyi məlum olub. Nəzarət tədbirləri keçirilərkən Əmircan qəsəbəsi Bəydəmirov küçəsində qanunsuz olaraq su satışı həyata keçirən sudaşıyan maşın aşkarlanıb. Belə ki, 10 HS 078 dövlət nömrə nişanlı sudaşıyan nəqliyyat vasitəsinin sahibi öz fərdi yaşayış evinin xəttindən küçəyə çıxış verib. Bu xətt vasitəsilə maşınını dolduraraq ayrı-ayrı vətəndaşlara su satışını həyata keçirib.
Aşkarlanmış hər bir fakt üzrə zəruri tədbirlər görülüb, özbaşına çəkilmiş xətlər və qoşulmalar ləğv edilib, Sudan İstifadə Qaydalarının tələblərinə uyğun olaraq qanunsuz istifadəyə görə dəymiş ziyan hesablanıb. Eyni zamanda, vətəndaşlar və sahibkarlar içməli sudan qanuni istifadə yolları barədə məlumatlandırılıb. Sudan qanunsuz istifadə edənlər bir daha bu cür əməllərdən çəkinməyə çağırılır və bildirilir ki, belə qanunazidd halların qarşısını almaq üçün tədbirlər mütəmadi davam etdiriləcək, özbaşına çəkilmiş xətlər ləğv olunacaq, belə halları təkrar törədənlərlə bağlı hüquq-mühafizə orqanlarına müraciət olunacaq.
Qeyd edək ki, cari ilin yanvar-noyabr aylarında içməli sudan qanunsuz istifadə ilə bağlı “Azərsu” üzrə 13 min 993, Suraxanı rayonu üzrə isə 697 fakt aşkarlanıb. Bu hallar üzrə müvafiq olaraq 4 milyon 64 min və 206 min kubmetr həcmində sərfiyyat bərpa olunub. Bu ilin 11 ayı ərzində sudan qanunsuz istifadə ilə bağlı 200-dək fakt araşdırılması üçün hüquq-mühafizə orqanlarına təqdim edilib.
Bölmənin digər xəbərləri
