Suraxanıda əmircanlı rəssamların sərgisi açılıb
Bakı, 9 dekabr, AZƏRTAC
Suraxanı rayonundakı Heydər Əliyev Mərkəzində Xalq Rəssamı Səttar Bəhlulzadənin 108 illiyi münasibətilə Əmircan rəssamlarının sərgisi açılıb. Sərgidə Əmircan qəsəbəsində yaşayan 27 rəssamın çəkdiyi əl işləri nümayiş olunur.
AZƏRTAC xəbər verir ki, sərginin açılış mərasimində Suraxanı Rayon İcra Hakimiyyətinin başçısı İlqar Abbasov çıxış edərək sərginin təşkilini yüksək qiymətləndirib. Bildirib ki, Əmircan torpağı bir çox tanınmış insanları - alimləri, rəssamları, şairləri, sənət adamlarını ölkəmizə bəxş edib. Onların arasında öz üslubu ilə seçilən Xalq Rəssamı Səttar Bəhlulzadə özünəməxsus yer tutur.
Diqqətə çatdırılıb ki, Prezident İlham Əliyev müvafiq Sərəncamı ilə fırça ustasının 100 illik yubileyi ölkəmizin hər yerində, o cümlədən xarici ölkələrdə və UNESCO miqyasında qeyd olunub.
Qeyd edilib ki, boyakarlıq sənətində xüsusi yeri olan Səttar Bəhlulzadənin dünya ictimaiyyətinə tanıdılmasında mədəni irsimizin himayədarı, Birinci vitse-prezidenti, Heydər Əliyev Fondunun prezidenti Mehriban xanım Əliyevanın müstəsna xidmətləri var. Ölkəmizdə yaradıcı insanlara həmişə böyük diqqət və qayğı ilə yanaşılır. Onların müxtəlif səviyyələrdə sərgiləri təşkil olunur.
Tədbirdə Rəssamlar İttifaqının katibi, Xalq Rəssamı Ağəli İbrahimov, Əməkdar İncəsənət Xadimi, sənətşünaslıq üzrə fəlsəfə doktoru Ziyadxan Əliyev və başqaları çıxışlarında sərginin əhəmiyyətindən danışıblar.
Sonra iştirakçılar sərgi ilə tanış olublar.
Tədbirin sonunda sərgi iştirakçılarına diplom və kataloq təqdim edilib.
Bölmənin digər xəbərləri
