Bakı, 20 aprel, AZƏRTAC

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr aprelin 20-də Şuşa Rayon İcra Hakimiyyəti başçısı yanında Şuranın iclasında müzakirə olunub. Bu barədə AZƏRTAC-a rayon icra hakimiyyətindən məlumat verilib.

Rayonun idarə və müəssisələrinin, hüquq mühafizə orqanlarının, ictimaiyyət nümayəndələrinin iştirakı ilə keçirilən yığıncaqda Şuşa Rayon İcra Hakimiyyətinin başçısı Bayram Səfərov aprelin 11-də ölkəmizdə azad, şəffaf, demokratik şəraitdə keçirilmiş prezident seçkilərində İlham Əliyevin möhtəşəm qələbəsinin xalqımızın dövlətimizin başçısına etimadının təzahürü olduğunu bildirib.

Azərbaycan Prezidenti İlham Əliyevin sədrliyi ilə Nazirlər Kabinetinin 2018-ci ilin I rübünün sosial-iqtisadi inkişafının yekunlarına həsr olunmuş iclası barədə məlumat verən B.Səfərov dövlətimizin başçısının geniş nitq söyləyərək aparılan ardıcıl və köklü iqtisadi islahatlar nəticəsində ölkəmizdə sosial-iqtisadi inkişafın bütün sahələrində əldə olunmuş nailiyyətlərdən ətraflı söz açdığını və qarşıda duran vəzifələri diqqətə çatdıraraq, həmin vəzifələrin həlli ilə bağlı öz tapşırıq və göstərişlərini verdiyini bildirib.

İcra hakimiyyətinin başçısı birinci rüb ərzində qeyri-neft sektorunun 3 faiz artdığını, sənaye istehsalının 2 faiz, qeyri-neft sənayesində artımın 10 faiz səviyyəsində olduğunu, kənd təsərrüfatının 4,2 faiz artdığını söyləyib.

Hesabat məruzəsində rayon üzrə ayrı-ayrı sahələrdə müvafiq dövr ərzində görülmüş işlər, həyata keçirilmiş tədbirlər və qarşıda duran vəzifələr diqqətə çatdırılıb. Bildirilib ki, təhsil, səhiyyə, mədəniyyət sahələrində səmərəli iş qurulmasına kömək göstərilib.

Şuşa rayonunun ümumtəhsil müəssisələrinin 20 məktəblisi Prezident İlham Əliyevin tapşırığı ilə keçirilən “Ölkəmizi tanıyaq” layihəsi çərçivəsində mart ayında respublikanın şimal bölgələrində olub, doğma vətənimizi daha dərindən tanımaq imkanı qazanıblar.

Ölkə başçısının müvafiq tapşırığına uyğun olaraq, respublikamızın bütün bölgələrində olduğu kimi, əhalinin pulsuz tibbi müayinədən keçirilməsinə başlanılıb və hazırda uğurla davam edir. Aksiyaya start verildiyi gündən - 2018-ci il fevralın 10-dan aprelin 1-dək rayon əhalisinin 18 və yuxarı yaşda olan 24 min 68 nəfərindən 18741 nəfəri tibbi müayinələrdən keçib. Müayinələr zamanı müxtəlif xəstəliklər aşkarlanan vətəndaşlardan 784 nəfər ambulator, 72 nəfər stasionar, 63 nəfər ixtisaslaşmış tibb müəssisələrinə müalicəyə göndərilib.

Şuşa rayonuna məxsus torpaq sahələrində, Mirzələr qış yatağında, Kürdəmir ərazisində və rayon əhalisinin kənd təsərrüfatı ilə məşğul olduğu respublikanın digər rayonlarında yaz şumu keyfiyyətlə aparılıb.

Rayon gənclərinin həqiqi hərbi xidmətə çağırışı məsələləri rayon icra hakimiyyəti tərəfindən ciddi nəzarətdə saxlanılıb.

Rayonun hüquq mühafizə orqanları ictimai-siyasi sabitliyin təmin olunması sahəsində üzərlərinə düşən vəzifələri layiqincə yerinə yetirməyə nail olub.

“Vətəndaşların müraciətləri haqqında” Azərbaycan Respublikasının Qanununa uyğun olaraq rayon icra hakimiyyəti başçısı aparatı, inzibati ərazi dairələri üzrə nümayəndəliklərində vətəndaşların yazılı və şifahi şəkildə ərizə ilə müraciət etmək hüquqlarının həyata keçirilməsi təmin edilib.

Hesabat dövrü ərzində milli mənəvi dəyərlərimizin, adət-ənənələrimizin qorunub saxlanması, inkişafı və təbliği, tarixi hadisələrin, əlamətdar günlərin qeyd edilməsi diqqət mərkəzində saxlanılıb.

Tədbirdə çıxış edən Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Şuşa rayon şöbəsinin rəisi Sarı Bərxudarov, Şuşa Mərkəzi Rayon Xəstəxanasının baş həkimi Ramiq Məhərrəmov, Şuşa Rayon İcra Hakimiyyəti başçısının Şuşa şəhər üzrə nümayəndəsi Arif İbrahimov dövlətimizin başçısının rəhbərliyi altında ölkə həyatının bütün sahələrində əldə edilmiş nailiyyətləri diqqətə çatdırıb, sosial-iqtisadi islahatlardan sonra ölkəmizin yeni inkişaf dövrünə qədəm qoyduğunu və hesabat dövründə görülən işlərin bundan sonra da uğurla davam etdiriləcəyinə əminliklərini bildiriblər.