Ermənistanda seçkilərdə səslərin sayılması başa çatıb: parlamentdə dörd siyasi güc təmsil olunacaq
Bakı, 8 iyun, AZƏRTAC
Ermənistan Mərkəzi Seçki Komissiyası iyunun 7-də keçirilən parlament seçkilərinin ilkin nəticələrini açıqlayıb.
AZƏRTAC “Armenpress”ə istinadla xəbər verir ki, 2005 seçki məntəqəsində səsvermənin nəticələri hesablanıb və ümumilikdə 1.476.916 seçici səs verib. Dərc olunmuş nəticələrə əsasən, “Vətəndaş müqaviləsi” partiyası seçicilərin 727 160-nın (49.81 faiz) səslərini toplayıb. İkinci yerdə “Güclü Ermənistan” bloku - 340.062 səs (23,29 faiz) qərarlaşıb. Parlamentə daxil olacaq daha iki siyasi güc “Ermənistan” bloku 146 097 (9,94 faiz) və “Çiçəklənən Ermənistan” partiyası 58 367 (4 faiz) səs toplayıb.
Beləliklə, parlament seçkilərindən sonra Ermənistanın yeni parlamentində dörd siyasi güc təmsil olunacaq: “Vətəndaş müqaviləsi” partiyası (61 yer), “Güclü Ermənistan” bloku (28 yer), “Ermənistan” bloku (11 yer) və “Çiçəklənən Ermənistan” partiyası (5 yer).
Bölmənin digər xəbərləri
