Azərbaycan sülhə, sabitliyə və Qafqazın davamlı inkişafına sadiqliyini nümayiş etdirir
Bakı, 21 sentyabr, AZƏRTAC
2020-ci ildə 44 günlük Vətən müharibəsində tarixi Zəfər əldə edən Azərbaycan təkcə torpaqlarını işğaldan azad etmədi. Eyni zamanda, Türk dünyasının şahlanışının əsasını qoydu, regionda əbədi sülhün, inkişafın və tərəqqinin təməlini formalaşdırdı. Lakin Zəfərdən sonra bir məsələ də öz həllini gözləyirdi. 2020-ci il 10 noyabr tarixli üçtərəfli Bəyanata əsasən, Azərbaycan ərazisində qalan erməni qoşun hissələri ərazimizdən çıxarılmalı idi. Buna baxmayaraq, Ermənistan 2023-cü ilə qədər qoşunlarını geri çəkmədi, əksinə, Azərbaycana qarşı müxtəlif təxribatlar və terror cəhdləri həyata keçirdi. Nəticədə, 2023-cü il sentyabrın 19-20-də Azərbaycan 23 saat 43 dəqiqə ərzində həyata keçirilən lokal xarakterli antiterror əməliyyatı ilə ölkənin bütün ərazisində dövlət suverenliyini bərpa etdi.
Bu fikirləri AZƏRTAC-a açıqlamasında “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri bildirib.
Siyasi şərhçi deyib ki, bu, uzun illər separatçılıq yuvasına çevrilmiş Xankəndinin artıq azad, abad və Azərbaycanın bir şəhəri kimi inkişafı üçün də zəmin yaratdı. Ötən müddətdə Azərbaycanın Qarabağ və Şərqi Zəngəzurda həyata keçirdiyi abadlıq və quruculuq işlərindən Xankəndi də öz payını alıb: “Azərbaycanın dövlət suverenliyinin bərpası həm tarixi Zəfərin, həm də sonrakı antiterror əməliyyatının nəticəsi idi. Ümumiyyətlə, Azərbaycan dövləti uzun illər problemin sülh yolu ilə həllinə tərəfdar olub, bununla bağlı müxtəlif cəhdlər göstərib. Lakin Ermənistan xarici havadarlarına arxalanaraq işğalçı siyasətindən əl çəkmədi. Nəticədə Azərbaycan öz ərazi bütövlüyünü bərpa etdi, torpaqlarını işğaldan azad etdi və beynəlxalq birliyin, xüsusilə də BMT Təhlükəsizlik Şurasının uzun illər icra olunmayan qətnamələrinin yerinə yetirilməsini təmin etdi. Bu, sıradan bir məsələ deyildi. Bu, eyni zamanda, bütöv Azərbaycanın formalaşması, dövlət suverenliyimizin tam təmin olunması demək idi”.
Nadir Azəri bildirib ki, Azərbaycan qalib ölkə olmasına baxmayaraq, sülhə, sabitliyə və Qafqazın davamlı inkişafına sadiqliyini nümayiş etdirir: “Əksər ölkələrin nümunəsində qalib gələn tərəf adətən şərtlər diktə edir. Lakin Azərbaycan yenə də sülhə və sabitliyə sadiq olduğunu nümayiş etdirir. Bu gün də Azərbaycan Qafqazda əbədi sülhün təmin olunması üçün əlindən gələni edir. Ötən ilin avqustunda Vaşinqtonda Ermənistan-Azərbaycan sülh sazişinin paraflanması, eyni zamanda, Zəngəzur dəhlizi ilə bağlı razılığın əldə olunması Azərbaycanın sülh və sabitliyə sadiqliyinin nəticəsidir. Bu, həm də Zəfərdən və antiterror əməliyyatından sonra Azərbaycanın regionda yaratdığı reallıqlardan doğan nəticədir. Artıq bu reallıqları bütün dünya qəbul edir”.
O qeyd edib ki, bütün bunlar bizi arxayın salmamalıdır: “Dövlətimizin başçısı dəfələrlə çıxışlarında bildirib ki, Azərbaycan dövləti sülhə sadiq qalsa da, düşmənlərin bizə nələr etdiyini unutmur. Xocalı faciəsini, digər faciələrimizi və işğal faktlarını unutmur. Prezident gəncliyə, o cümlədən cəmiyyətə çağırış edir ki, bu məsələlər unudulmamalıdır. Hesab edirəm ki, son günlər, xüsusilə də diplomatların Qarabağ bölgəsinə səfərindən sonra Ermənistanda yaranan hay-küy və separatçıların bəyanatları bir daha sübut edir ki, biz sülhə sadiq olmaqla yanaşı, düşmənin kimliyini də unutmamalıyıq. Biz ərazi bütövlüyünün və dövlət suverenliyinin qiymətini bilməli, onu qorumalıyıq. Antiterror əməliyyatları zamanı qaçaraq Ermənistanda gizlənən, indi isə yenidən cılız səslərini qaldıranlara isə iki məqamı xatırlatmaq olar. Birinci məqam: Dəmir yumruq yerindədir. İkinci məqam isə odur ki, onlar hazırda Bakıda barmaqlıqlar arasında oturan və qanun qarşısında cavab verən separatçı liderlərdən nəticə çıxarmalıdırlar. Bilməlidirlər ki, separatçılıq, terrorçuluq və müharibə cinayətləri gec-tez öz cəzasını alır”.
Bölmənin digər xəbərləri
