Şuşada beynəlxalq blogerlər üçün ustad dərsi təşkil olunub
Bakı, 25 noyabr, AZƏRTAC
Noyabrın 25-də İslam Əməkdaşlıq Təşkilatı Gənclər Forumu Avrasiya Regional Mərkəzinin (İƏGF Avrasiya Regional Mərkəzi) təşəbbüsü ilə həyata keçirilən “Show Me Azerbaijan” (Mənə Azərbaycanı göstər) layihəsi çərçivəsində ABŞ, Fransa, İspaniya, İndoneziya, Qazaxıstan, Türkiyə, Misir və ümumilikdə sayı 10-dan çox ölkəni təmsil edən bloger Şuşa şəhərinə səfər edib.
İslam Əməkdaşlıq Təşkilatı Gənclər Forumundan AZƏRTAC-a bildiriblər ki, qonaqları qarşılayan Şuşa Şəhəri Dövlət Qoruğu İdarəsinin aparıcı mütəxəssisi İsmayıl İsmayılov onlara şəhərin tarixi və mədəni abidələri haqqında, eləcə də şəhərin erməni işğalından azad edilməsində Azərbaycan əsgərlərinin göstərdiyi qəhrəmanlıq haqqında məlumat verib.
Sonra blogerlər şəhərin güllələnmiş abidələrini, Natəvanın evini, Şuşa qalasını, Vaqifin məqbərəsini, şəhərin tanınmış bəylərinin evlərini ziyarət ediblər, eləcə də Cıdır düzündə olublar. Xarici blogerlər öz yutub kanallarında Şuşa təəssüratları ilə bağlı bir sıra paylaşımlar ediblər.
D.Bernard, eləcə də öz yutub abunəçiləri üçün Şuşadan videopaylaşım edərək işğal dövründə dağıdılmış evlərlə bağlı təəssüfünü qeyd edib, bu evlərin tezliklə bərpa olunacağına inandığını diqqətə çatdırıb.
Misirli bloger Əmr Əl-Agizi Şuşada və Füzulidə son müharibənin nəticəsi olaraq evlərin dağıdıldığını, Füzulinin “ruhlar şəhərinə” çevrildiyini bildirib. İndoneziyalı bloger Diska Reşa Putra, qazax Asel Axmetova paylaşımlarında diqqəti minalanmış ərazilərə yönəldiblər. İspaniyadan olan bloger Marina Qomez isə Şuşanı “Azərbaycanın böyük musiqiçilər və şairlər şəhəri” adlandıraraq bu şəhərin təbiətinə heyran olduğunu bildirib.
Şuşa səfəri çərçivəsində proqramın ikinci hissəsi olaraq məşhur amerikalı bloger Duqlas Bernardın ustad dərsi təlimləri keçirilib. O, müasir dünyada blogerlik sənətinin əhəmiyyətindən, illər ərzində qazandığı təcrübə haqqında danışıb, eləcə də “Show Me Azerbaijan” proqramı haqqında təqdimat edərək, onun Azərbaycan və Qarabağ həqiqətlərinin dünya ictimaiyyətinə çatdırılmasında oynadığı roldan, son zamanlar proqrama olan marağın artmasından bəhs edib. İƏGF Avrasiya Regional Mərkəzinin əməkdaşı Aydan Bağırlı təmsil etdiyi qurum haqqında blogerlər qarşısında təqdimatla çıxış edib. Mərkəz təsis olunandan bəri həyata keçirilən beynəlxalq layihələr barədə, xüsusilə, müsəlman gənclərin həmrəyliyi istiqamətində görülən işlər barədə məlumat verib.
Layihənin əsas məqsədi Azərbaycan Respublikasının Prezidenti İlham Əliyevin bu ilin “Şuşa İli” elan edilməsi ilə əlaqədar bu şəhərə ediləcək səfər çərçivəsində (Show Me Azerbaijan - Beynəlxalq blogerlərin Şuşa düşərgəsi) xarici blogerləri Qarabağın təbiəti, mədəni abidələri və tarixi yerləri, xüsusilə, Şuşanın Azərbaycana aid olmasını sübut edən mədəni irsi, o cümlədən erməni işğalının nəticəsi kimi yaşayış məntəqələrinin və mədəni abidələrin vandalizmə məruz qalması, eyni zamanda, bu şəhər işğaldan azad olunduqdan sonra həyata keçirilən bərpa və yenidənqurma işləri ilə tanış etmək, sonda onların səfər təəssüratlarını dünyaya yaymaqdır.
Qeyd etmək lazımdır ki, İƏGF Avrasiya Regional Mərkəzinin təşəbbüsü ilə keçən il ərzində oxşar tədbirlər uğurla reallaşdırılıb.
Belə ki, “Show Me Azerbaijan” layihəsi çərçivəsində 8 ölkədən 13 bloger, o cümlədən ABŞ və Əlcəzairdən olan 3 tanınmış videobloger işğaldan azad olunmuş ərazilərə səfər edərək erməni işğalı nəticəsində dağıdılmış yaşayış məskənləri, tarixi abidələr haqqında hazırladıqları videoreportajları yutub kanallarında yayımlayıblar. Bu reportajlara yeddi milyondan çox insan baxıb. Bu ilin sonunadək Qarabağla bağlı blogerlərin çəkdiyi videoreportajların və onlara baxış sayının artırılması layihənin əsas məqsədlərindən biridir.
Bölmənin digər xəbərləri
