ŞUŞALILAR GÖRÜLMÜŞ İŞLƏRİ MÜZAKİRƏ EDİRLƏR
AZƏRTAC xəbər verir ki, avqustun 7-də Şuşa rayonu ictimaiyyətinin nümayəndələri Prezident İlham Əliyevin sədrliyi ilə Nazirlər Kabinetinin 2008-ci ilin birinci yarısının sosial-iqtisadi yekunlarına həsr olunmuş geniş iclasından irəli gələn vəzifələri müzakirə etmişlər.
Rayon icra hakimiyyətinin başçısı Nizami Bəhmənov hesabat məruzəsində ölkənin yarımillik sosial-iqtisadi göstəriciləri barədə məlumat vermiş, müxtəlif sahələrdə, o cümlədən ordu quruculuğunda qazanılmış uğurları xatırlatmışdır. Natiq vurğulamışdır ki, bu il iyunun 26-da keçirilmiş parad hərbi potensialımızı göstərdi, hərbçilərimizin peşəkarlığının nümayişinə çevrildi, ordumuzun qüdrətinə inamımızı artırdı. Bu qüdrət isə Azərbaycanın ərazi bütövlüyünün bərpası üçün həlledici amildir. Məruzəçi ölkə başçısının Ermənistan-Azərbaycan, Dağlıq Qarabağ münaqişəsinin həlli ilə bağlı fikirlərini, dövlətimizin dəyişməz mövqeyini yığıncaq iştirakçılarının diqqətinə çatdırmışdır.
N.Bəhmənov bildirmişdir ki, Şuşa erməni silahlı qüvvələri tərəfindən işğal olunandan sonra əhali respublikanın 50-dən artıq rayonunda məskunlaşmışdır. Məcburi köçkünlərin yaşayış şəraitinin yaxşılaşdırılması və sosial problemlərinin həlli ilə bağlı görülən tədbirlər şura iclasında təsdiq edilmiş müvafiq plan əsasında həyata keçirilir. 2004-2008-ci illər ərzində 806, hesabat dövründə isə 55 yeni iş yeri yaradılmışdır. Bu müddətdə ümumi məhsul buraxılışının həcmi 543 min manat olmuşdur. Bunun 180 min manatı kənd təsərrüfatının payına düşür. Əhalinin orta aylıq əmək haqqı ötən ilin müvafiq dövrü ilə müqayisədə 30 faiz artaraq 136 manata çatdırılmışdır. Hazırda vaxtilə rayona məxsus olmuş qış yataqlarında 52 kəndli (fermer) təsərrüfatı fəaliyyət göstərir.
Natiq xatırlatmışdır ki, rayon üzrə 2008-ci ildə görüləcək işlər barədə 21 bəndlik tədbirlər planı hazırlanaraq Qaçqınların və Məcburi Köçkünlərin İşləri Üzrə Dövlət Komitəsi, Məcburi Köçkünlərin Sosial İnkişaf Fondu ilə razılaşdırılmışdır. Planda nəzərdə tutulmuş tədbirlərdən 7-si artıq yerinə yetirilmişdir. İlin birinci yarısında özlərindən asılı olmayaraq, iş yerlərini itirmiş büdcə təşkilatlarının işçilərinə orta aylıq əmək haqqı ödənilmişdir.
Yığıncaqda yeni dərs ilinə hazırlığın vəziyyətindən, əhalinin sosial müdafiəsinin gücləndirilməsi sahəsində görülmüş işlərdən, şəhid ailələrinə, əlil və imkansızlara göstərilmiş maddi yardımdan da danışılmışdır.
Məruzəçi və digər natiqlər bəyan etmişlər ki, Şuşa rayonunun ictimaiyyəti bundan sonra da dövlətçiliyə sadiq qalacaq, ölkəmizin qüdrətinin artırılması üçün səyini əsirgəməyəcəkdir.
Bölmənin digər xəbərləri
