SUVARMA KANALLARI BƏRPA OLUNUR
AZƏRTAC xəbər verir ki, Qax rayonunun Qaxbaş və Qax İngiloy kəndlərinin ərazilərindən keçən magistral kanalın bərpasına başlanılmışdır.
Tikinti işlərini “Meliorasiya və Su Təsərrüfatı” Açıq Səhmdar Cəmiyyətinin tebeliyində olan tikinti təşkilatlarının və rayon Suvarma Sistemləri İdarəsinin kollektivləri həyata keçirirlər. Kanalın bərpasına dövlət büdcəsindən 585 min manat vəsait ayrılmışdır. Bərpa işlərinə kanalın 3,4 kilometrlik hissəsinın, habelə üzərindəki 3 körpü və keçidin əsaslı təmiri daxildir. Bərpa işləri başa çatdıqdan sonra Qax-İlisu avtomobil yolu daha da genişlənəcəkdir.
Bundan əlavə, hazırda səhmdar cəmiyyətin xətti ilə Qaxmuğal ərazisində suvarma kanalı və onun suayırıcı qurğusunun bərpası da davam etdirilir. Bu məqsədlə dövlət büdcəsindən 700 min manat vəsait ayrılmışdır. Suvarma kanalının 1200 metrlik hissəsinə beton üzlük çəkiləcək, 2700 metrlik hissəsinə daş döşənəcəkdir. Bərpa işlərini “Şəki Aqrar-Tikinti” müəssisəsinin kollektivi həyata keçirir.
Hər iki kanalda bərpa işlərinin 2008-ci ildə başa çatdırılması nəzərdə tutulmuşdur.
Bölmənin digər xəbərləri
