Tailandda COVID-19 virusuna sutkalıq yoluxmada antirekord qeydə alınıb
Pekin, 12 avqust, AZƏRTAC
Tailandda ötən sutka COVID-19 virusuna 22 min 782 yoluxma qeydə alınıb. Bu, Tailandda indiyədək ən yüksək sutkalıq yoluxmadır.
AZƏRTAC Tailand mediasına istinadla xəbər verir ki, ötən sutka virus səbəbindən 147 ölüm aşkarlanıb. Bir həftədən çoxdur ki, Tailanda sutkalıq yoluxma sayı 20 min ətrafında dəyişir. Ölkədə indiyədək 839 min 771 nəfər virusa yoluxub, 6942 nəfər pandemiyanın qurbanı olub.
Tailandda iyulun ortasından karantin rejimi sərtləşdirilib. Amma hələ də virusun yayılmasını nəzarət altına almaq mümkün olmayıb. Hökumət vaksinasiyanı sürətləndirmək üçün ölkədə istehsal olunan "AstraZeneca" peyvəndinin ixracını məhdudlaşdırıb. İndiyədək ölkə əhalisinin cəmi 7 faizinə COVID-19 peyvəndi vurulub. Hökumət ilin sonunadək əhalinin 70 faizini peyvəndləməyi hədəfləyib.
Qeyd edək ki, hazırda pandemiyanın ən ağır dalğasının müşahidə olunduğu Tailandda aprelin əvvəlindən etibarən sutkalıq yoluxma sayı davamlı çoxalır. Virusun “delta” ştamı ölkədə sürətlə yayılır. Hökumət bu səbəbdən mobil xəstəxanaların və müvəqqəti karantin mərkəzlərinin inşasına başlayıb. Təkcə paytaxtda 20 müvəqqəti özünütəcrid mərkəzi fəaliyyət göstərəcək.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
