Tarix Muzeyində “Anadır arzulara hər zaman Qarabağ” sərgisinin açılışı olub
Bakı, 19 may, AZƏRTAC
Mayın 19-da Milli Azərbaycan Tarixi Muzeyində “Anadır arzulara hər zaman Qarabağ” adlı sərginin açılışı olub.
AZƏRTAC xəbər verir ki, Azərbaycanın Vətən müharibəsində parlaq qələbəsi və torpaqlarımızın azad edilməsinə həsr olunmuş sərgi döyüş iştirakçılarına məxsus olmuş eksponatlar əsasında qurulub. Açılış tədbiri karantin şəraitini nəzərə alaraq məhdud sayda iştirakçı ilə təşkil edilib.
Sərginin açılış mərasimində muzeyin baş direktoru, akademik Nailə Vəlixanlı çıxış edib. N.Vəlixanlı bildirib ki, sərginin keçirilməsində məqsəd Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin nümayiş etdirilməsi, şəhidlərimizin əziz xatirəsinin əbədiləşdirilməsidir.
AMEA-nın vitse-prezidenti, akademik İsa Həbibbəyli 44 günlük Vətən müharibəsində qazandığımız qələbəni əbədiləşdirmək üçün muzeydə yaradılmış Vətən müharibəsi fondunun fəaliyyətini yüksək dəyərləndirib. Akademik Vətən müharibəsində Müzəffər Ali Baş Komandanın rəhbərliyi ilə Azərbaycan Ordusunun tarix yazan şəhid və qazilərindən danışıb. O, bu gün bizim şanlı tarix yaşadığımızı və tarix yazan qəhrəmanlarımızın şəxsi əşyalarının muzeydə əbədi qorunacağını xüsusi qeyd edib.
Muzeyin baş direktoru Nailə Vəlixanlı sərginin hazırlanması məqsədilə materialların toplanılması üçün göstərdikləri köməyə görə Milli Qəhrəman, general-mayor Polad Həşimovun qardaşı İlham Həşimova, Milli Qəhrəman, polkovnik İlqar Mirzəyevin oğlu Elvin Mirzəyevə, Milli Qəhrəman, polkovnik Şükür Həmidovun qardaşı Əsəd Həmidova, polkovnik Babək Səmidlinin bacısı oğlu Gülməmməd Səfərzadəyə, gizir Xudayar Yusifzadənin anası Radə Qurbanovaya təşəkkürnamələr təqdim edib.
Qeyd edək ki, sərginin açılış mərasimində Dövlət Təhlükəsizliyi Xidməti, Daxili İşlər Nazirliyi və KİV nümayəndələri iştirak ediblər.
Sonra mərasim iştirakçıları sərgi ilə yaxından tanış olublar.
Muzeyin Elmi ekspozisiya və sərgilərin təşkili şöbəsinin müdiri, sərginin kuratoru, tarix üzrə fəlsəfə doktoru, dosent Səbuhi Əhmədov sərgi haqqında ətraflı məlumat verib. O bildirib ki, sərgidə 2020-ci ilin iyulunda baş vermiş Tovuz döyüşlərinin iki qəhrəmanı (general-mayor Polad Həşimov və polkovnik İlqar Mirzəyev), həmçinin Vətən müharibəsinin 101 şəhid və qazisinin əşyaları nümayiş olunur. Burada hərbi uniforma, ləvazimat, qəlpə və güllələr, şəxsi sənədlər, fotoşəkillər göstərilir. Sərginin hər bölməsində müvafiq informasiya panelləri yerləşdirilib. Habelə Azərbaycan istehsalı olan “İti qovan” pilotsuz uçuş aparatının orijinal ölçülü maketi qurulub. Sərgidə Müdafiə Nazirliyi, Dövlət Təhlükəsizliyi Xidməti, Dövlət Sərhəd Xidməti, DİN Daxili Qoşunları, Fövqəladə Hallar Nazirliyi, Azərbaycan Respublikasının Minatəmizləmə Agentliyi tərəfindən təqdim edilmiş eksponatlar, eyni zamanda, Ermənistan ordusundan qənimət götürülmüş hərbi geyim, ləvazimatlar və s. nümayiş olunur. Ümumilikdə sərgidə 30 vitrində 557 eksponat, 12 informasiya-məlumat paneli, 7 iriölçülü banner, 204 ədəd fotoşəkil yer alıb.
Qeyd edilib ki, “Anadır arzulara hər zaman Qarabağ” sərgisinin tərkib hissəsi kimi təşkil olunmuş “Ermənistanın dövlət terrorizmi azərbaycanlı fotoqrafların obyektivində” adlı fotosərgidə Vətən müharibəsi dövründə Azərbaycanın dinc şəhər və kəndlərinə vurulmuş raket-artilleriya zərbələrinin nəticələri, eləcə də 30 ilə yaxın müddətdə işğal altında olmuş ərazilərdə həyata keçirilmiş siyasəti nümayiş etdirən 7 fotoqrafın çəkdiyi 50 ədəd fotoşəkil, Gəncə və Bərdəyə vurulmuş raket zərbələrinə dair onlarla eksponat, 4 iriölçülü diorama nümayiş olunur.
Bölmənin digər xəbərləri
