AZƏRTAC-ın müxbiri Tbilisidən xəbər verir ki, Gürcüstan Leyboristlər Partiyasının şəhərin mərkəzi rayonlarından birində yerləşən baş ofisi qarşısında noyabrın 29-da səhər güclü partlayış olmuşdur. Binada bütün şüşələr sınmışdır. Tələfat yoxdur.

Hadisə yerinə gələn polis bunun sadəcə kriminal, yaxud partiyanın siyasi fəaliyyəti ilə bağlı olub-olmadığını müəyyənləşdirmək üçün təhqiqat aparır.

Leyboristlər Partiyası son illər Eduard Şevardnadzeyə müxalifətdə olmaqla yanaşı, “Milli hərəkat” və “Burcanadze-demokratlar” bloklarının liderlərini daim tənqid edirdi.

Xatırladaq ki, leyboristlər noyabrın 2-də keçirilən parlament seçkilərində 12 faiz səs toplayaraq, 20 deputat yeri qazanmışdılar.