TƏBABƏT XƏBƏRLƏRİ
Alimlər çayın insan ürəyinə faydalı təsirini növbəti dəfə təsdiq etmişlər. Dəmlənmiş çay ürək əzələlərinin işini gücləndirməklə yanaşı, onu infarktın inkişaf etməsindən qorumağa da qadirdir. Londonda çıxan “İndependent” qəzeti bu barədə 1,9 min adamın iştirakı ilə tədqiqatlar aparmış ekspertlərin əldə etdikləri qəribə faktları dərc etmişdir.
Hərəsi bir dəfə infarkt keçirən bu adamlar hospitaldan çıxandan dərhal sonra həkimlər tərəfindən özlərinin qida rejimi barədə ətraflı sorğu-suala tutulmuş, söhbət xüsusən çaydan getmişdir. İTAR-TASS-ın verdiyi xəbərə görə, 1019 nəfər bu içkini sevmədiyini, 615 nəfər ondan az istifadə etdiyini, 266 nəfər isə dəmlənmiş çayı çox sevdiyini bildirmişdir. İkinci sorğu dörd ildən sonra keçirilmişdir. Bu müddət ərzində əvvəlki sorğuda iştirak edənlərin 313 nəfəri təkrar infarktdan ölmüşdür.
Son nəticədə müəyyən edilmişdir ki, ölənlər arasında çay həvəskarlarının sayı çox az olmuşdur. Az çay içənlər arasında ölüm səviyyəsi isə çay içməyənlərə nisbətən üç dəfə azdır. Həkimlər bildirirlər ki, dəmlənmiş çay ürək əzələlərinin yığılmasını gücləndirir və qan damarlarının elastikliyini artırır, beləliklə də, tromb yaranması ehtimalı azalır.
X X X
Amerikalı ekspertlər arıqlamağı qarşılarına məqsəd qoymuş 32 min adam arasında aparılmış tədqiqatların nəticələrinə əsaslanaraq iddia edirlər ki, hətta ən yaxşı pəhriz də faydasız ola bilər. Məlum olmuşdur ki, müsbət nəticə əldə edənlərin əksəriyyəti arıqlamaq üçün xüsusi hazırladıqları proqramdan istifadə etmiş və ac qalma əvəzinə, fiziki təmrinlərlə məşğul olmuşlar.
Ekspertlərin “Konsyumer reports” jurnalında dərc etdirdikləri məqalədə deyilir: “Tədqiqatların nəticələri çoxdan yaranmış belə bir qənaətə yenidən baxmağa vadar edir ki, arıqlamaq üçün baha başa gələn proqram tərtib etmək, xüsusi ərzaq məhsulları almaq və ya mütəxəssislərin təyin etdikləri pəhrizi ciddi gözləmək lazımdır”. Tədqiqatlar sübut etdi ki, sorğuda iştirak edənlərin təxminən dörddə biri öz pəhrizlərinin köməyi ilə arıqlamışdır.
Qəzet yazır ki, arıqlayanların, demək olar ki, hamısına fiziki təmrinlər kömək etmişdir. Həftədə azı üç dəfə bədən tərbiyəsi ilə məşğul olanlar bunu əsas amil kimi qiymətləndirmişlər. Digərləri isə gündəlik həyatda fiziki yükün artırılmasına, məsələn, liftdən istifadə etməməyə etibar etmişlər.
“Konsyumer reports” tədqiqatlara əsaslanaraq, yemək seçərkən sellülozla zəngin olan ərzaq məhsullarını yaddan çıxarmamağı, ağ çörəkdən, kartofdan, şəkərdən və un məmulatından mümkün dərəcədə imtina etməyi, aclıq hissinin qarşısını almağa kömək edən proteindən daha çox istifadə etməyi məsləhət görür. Sulu meyvələr toxluq hissi yaradır. Ekspertlər hər cür yağlı yeməklərdən imtina etməyi məsləhət görmürlər. Qoz-fındığın, avokadonun, zeytunun və balığın tərkibində olan yağ insanı ürək xəstəliklərindən qoruya bilər.
X X X
B6 vitamini ilə zəngin olan banan, lobya, taxıl bitkiləri və digər məhsullar qocalığın və görmə qabiliyyətinin azalmasının qarşısını almağa kömək edir. Yaponiyanın Kanadzava universitetindən olan tədqiqatçılar bu fikri təsdiq edirlər. Kliniki tədqiqatların nəticələri sübut edir ki, qocalıqda yaranan ağıl kəmliyi və göz xəstəliyi - qlaukoma beyində qan dövranının pozulması, məsələn, beyin hüceyrələrinin /neyronların/ tədricən ölməsinə gətirib çıxaran ateroskleroz nəticəsində meydana gəlir. Bu prosesin mexanizmi hələ axıradək aydın deyildir, lakin yaponlar belə hesab edirlər ki, bütün bunların səbəbkarı zülalların parçalanmasına kömək edən külli miqdarda fermentlərdir. Onların fikrincə, B6 vitamini bu fermentlərin fəallığının qarşısını alaraq neyronları mühafizə edir.
B6 vitamini ən çox ətdə, balıqda, yumurta sarısında, treska balığının və qaramalın qara ciyərində olur.
Bölmənin digər xəbərləri
