TƏBRİZDƏ ÜMUMMİLLİ LİDER HEYDƏR ƏLİYEVİN YUBİLEYİ QEYD OLUNMUŞDUR
AZƏRTAC-ın xüsusi müxbiri xəbər verir ki, Azərbaycan Respublikasının Təbrizdəki baş konsulluğunda ümummilli lider Heydər Əliyevin 85 illik yubileyi ilə bağlı mərasim keçirilmişdir.
Mərasimdə İranın Şərqi Azərbaycan Ostandarlığının rəsmiləri, Təbrizdəki diplomatik nümayəndəliklərin təmsilçiləri, şəhər ictimaiyyətinin tanınmış nümayəndələri, Azərbaycan Respublikasından gəlmiş alimlər iştirak etmişlər.
Mərasimi giriş sözü ilə açan baş konsul Ayxan Süleymanov ümummili lider Heydər Əliyevin xilaskarlıq missiyasından danışmışdır. Baş konsul dedi ki, Heydər Əliyev siyasi fəaliyyətinin bütün dövrlərində Azərbaycan xalqının işıqlı gələcəyinə xidmət edən böyük işlər görmüş, nəhəng layihələr həyata keçirmişdir. Qədirbilən Azərbaycan xalqı ulu öndərimizin əziz xatirəsini hər zaman uca tutur.
Tanınmış alim Qadir Qədirzadə və yazıçı-publisist Xanəli Kərimli ulu öndər Heydər Əliyevin həyat və fəaliyyətinin maraqlı məqamlarından bəhs etmişlər.
Sonra iştirakçılara ulu öndərimiz Heydər Əliyevin siyasi fəaliyyətini əks etdirən, müxtəlif dillərdə yazılmış kitablar təqdim edilmişdir. Konsulluqdakı fotostendlər, çoxsaylı kitab, jurnal və digər nəşrlər iştirakçılar tərəfindən maraqla qarşılanmışdır.
Bölmənin digər xəbərləri
