ELM VƏ TƏHSİL
Təhsil Kompleksinin müəllimi: Tələbəlik illərimi xatırlayanda Aida xanımın işıqlı siması gözlərimin önündə canlanır
Bakı, 10 oktyabr, AZƏRTAC
Müəllimlik müqəddəs peşədir. Hər insanın taleyində onun ən çox sevdiyi, həyatını nurla dolduran müəllimi olub. Bu gün də mən qürur duyuram ki, görkəmli şərqşünas-alim, filologiya elmləri doktoru, professor Aida İmanquliyevanın tələbəsi olmuşam. O, mənim sevimli müəllimim olub. Aida xanım haqqında alim, ana, gözəl və zərif qadın kimi çox yazılıb. O, gözəl insani keyfiyyətləri, yüksək pedaqoji təcrübəsi, öz daxili kamilliyi və mənəvi zənginliyi ilə daim diqqəti cəlb edirdi.
Bu sözləri AZƏRTAC-a müsahibəsində professor Aida İmanquliyevanın Azərbaycan Dövlət Universitetində (indiki Bakı Dövlət Universitetində) tələbəsi olmuş, 132-134 nömrəli Təhsil Kompleksinin müəllimi Gülnarə Məmmədova söyləyib. G.Məmmədova bildirib ki, universitetin Şərqşünaslıq fakültəsində təhsil aldığı illəri xatırlayanda müəllimi Aida xanım İmanquliyevanın gözəl, işıqlı siması həmişə gözləri önündə canlanır: “O, bizə təkcə ərəb dilini öyrətmirdi, həm də bizə daim öz faydalı tövsiyələrini verirdi. Tələbələr Aida xanımın mühazirələrinə xüsusi diqqət, maraq göstərirdilər. Gözəl siması, qayğıkeş baxışları, səmimi münasibətləri Aida xanımı bizə doğmalaşdırmışdı. Ona olan sevgimiz tükənməzdir”.
G.Məmmədova qeyd edib ki, ərəb ədəbiyyatının tədqiqində böyük uğurlar qazanmış Aida İmanquliyeva universitetin IV kursunda müasir ərəb ədəbiyyatını tədris edirdi. Onun Amerikada təşəkkül tapmış və formalaşmış məhcər ədəbiyyatı, yazıçıları haqqında mühazirələrini tələbələr həmişə dərin maraqla dinləyirdilər.
“Aida xanım böyük şərqşünas-alim, istedadlı pedaqoq, tərcüməçi, ictimai xadim, parlaq şəxsiyyət idi. Üç fundamental monoqrafiyanın (“Mixail Nüaymə” və “Qələmlər birliyi”, “Cübran Xəlil Cübran”, “Yeni ərəb ədəbiyyatı korifeyləri”) və 70-dən çox elmi məqalənin müəllifi Aida İmanquliyeva, həmçinin Şərq filologiyası sahəsində yazılmış bir çox elmi əsərlərin redaktoru olub. O, Azərbaycan şərqşünaslıq elmini ölkəmizin hüdudlarından kənarda da layiqincə təmsil edib”, - deyə Gülnarə Məmmədova bildirib.
G.Məmmədova qeyd edib ki, Aida xanım həm də sadə, nəcib, xeyirxah bir müəllim idi. O, ərəb dilini tələbələrə dərindən öyrətmək üçün pedaqoji metodlardan çox məharətlə istifadə edirdi: “Aida xanım mənim ərəb dilinə olan dərin sevgimi duyaraq deyərdi: “İnanıram ki, sən ərəb dilini hər zaman gənclərə həvəslə öyrədəcəksən”.
Mən Aida İmanquliyevanın qızıl medalla bitirdiyi 132-134 nömrəli Təhsil Kompleksində müəlliməm, şagirdlərə ərəb dili öyrədirəm. Bu gözəl və zəngin dili şagirdlərə öyrədəndə Aida xanımın sözlərini xatırlayır və onun inamını doğrultmağa çalışıram.
Aida xanım, qısa, lakin mənalı, şərəfli ömür yolu keçdi... Bəli, mən fəxr edirəm ki, Aida İmanquliyevanın tələbəsi olmuşam”, - deyə G.Məmmədova fikrini yekunlaşdırıb.