Avropa İttifaqının TASİS Proqramı ali məktəblərə texniki yardım proqramı çərçivəsində Azərbaycanda dörd yeni layihənin gerçəkləşdirilməsinə başlamışdır. “Tempus” proqramında Avropa İttifaqı ölkələrinin ali məktəblərlə əməkdaşlıq yolu ilə MDB ölkələrində ali təhsil sistemlərinin inkişafına texniki yardım nəzərdə tutulur. Büdcəsi 296,7 min avro olan “Azərbaycan ali məktəblərində çağdaş mühəndis təhsili” layihəsi Azərbaycan Texniki Universitetində, Dövlət Neft Akademiyasında, Sumqayıt Dövlət Universitetində və Mingəçevir Politexnik İnstitutunda həyata keçiriləcəkdir. Dəyəri 255 min avro olan “Binanın iqtisadiyyatı: tikintisi və qorunması” layihəsi isə Azərbaycan Memarlıq və İnşaat Universitetində gerçəkləşdiriləcəkdir.
Gəncə Kənd Təsərrüfatı Akademiyasında reallaşdırılan “Cənubi Qafqaz bölgəsində ekoloji biliklərlə tanışlıq” layihəsi üçün Avropa İttifaqı tərəfindən 296,7 min avro ayrılmışdır. Büdcəsi 247 min avro olan “Cənubi Qafqazda bioloji və veterinar təhsil üzrə milli bilik mərkəzlərinin yaradılması” layihəsinin gerçəkləşdirilməsi üçün isə Bakı Dövlət Universiteti və Tibb Universiteti seçilmişdir. Bütün layihələr Avropa universitetləri ilə birgə iki il ərzində həyata keçiriləcəkdir.
