TƏLƏBƏ QƏBULU ÜZRƏ DÖVLƏT KOMİSSİYASI SUMQAYITDA ZONA MÜŞAVİRƏSİ KEÇİRMİŞDİR
Quba, Xaçmaz, Dəvəçi, Xızı, Qusar, Abşeron, Qobustan, Ağsu, Şamaxı, Qubadlı, Siyəzən rayonlarının və Sumqayıtın təhsil şöbələrinin rəhbərləri müşavirənin təşkilatçısı – Tələbə Qəbulu üzrə Dövlət Komissiyasının təqdim etdiyi materiallarla tanış olmuşlar.
Komissiyanın sədri Məleykə Abbaszadə çıxış edərək bildirmişdir ki, 1994-cü ildən başlayaraq komissiya test imtahanlarının yekunlarına dair analitik materiallar paketi hazırlayır və ayrı-ayrı bölgələrdə zona müşavirələri keçirir. Aparılan araşdırmaların yekunları respublikanın bütün məktəblərinə göndərilir. Bunlarda imtahanların nəticələri müxtəlif parametrlərdə əyani şəkildə göstərilir ki, bu da təhsil sistemi işçilərinin real mənzərə ilə tam tanış olmasına imkan verir.
Sonra M. Abbaszadə builki test imtahanlarının yekunlarını konkret faktlarla ətraflı səciyyələndirmişdir. Ötən illərin müqayisəli göstəricilərinin təhlili sübut edir ki, ali təhsil almaq istəyənlərin sayı xeyli artmışdır. Belə ki, 1992-ci ildə 40 mindən artıq ərizə verilmişdisə, bu il onların sayı 69 mindən çox olmuşdur. Bu isə gənclərin cəmiyyət həyatında öz rolunu real şəkildə dərk etdiyini göstərir. Pullu təhsilə sənədlərin qəbulunun xeyli artması isə əhalinin həyat səviyyəsinin yüksəldiyini sübut edir. 13 min ailə öz uşaqlarını ödənişli əsasda oxutmaq istədiklərini bildirmişdir.
Texniki ali məktəblərdə təhsil almaq arzusunda olanların sayı da xeyli artmışdır. Belə ki, bu il birinci qrupdakı 8281 yerə 18381 abituriyent iddiaçı idi. Bununla belə, abituriyentlərin bilik səviyyəsinin aşağı olması da narahatlıq doğurur. Ərizə verənlərin 65 faizi 150 ballıq həddi (minimal hədd) keçə bilməmişdir. Bilikləri 300 baladək qiymətləndirilən abituriyentlərin faizi isə kifayət qədər yüksəkdir.
Müşavirə iştirakçılarına abituriyentlərin orta statistik göstəricilərinin
dinamikası, ali məktəblərin reytinqləri, habelə ayrı-ayrı rayonlar üzrə keyfiyyət göstəriciləri barədə məlumat da təqdim olunmuşdur.
Respublikanın fərqlənmiş orta təhsil müəssisələrinə bütün siniflər üçün ayrı-ayrı fənlər üzrə test kitabları təqdim edilmişdir. Bu kitablar Tələbə Qəbulu üzrə Dövlət Komissiyası tərəfindən tərtib və nəşr olunaraq, məktəb kitabxanalarına təmənnasız verilmişdir.
Müşavirə iştirakçıları ölkənin yaradıcılıq və idman ali məktəblərinə abituriyentlərin qəbulunun təşkili məsələsinə də münasibətlərini bildirmiş, minimum ümumi biliklərə malik olmayan, hətta ən istedadlı abituriyentlərin də bu ali məktəblərə qəbul edilməsinin yolverilməzliyini vurğulamışlar.
Axırda Tələbə Qəbulu üzrə Dövlət Komissiyasının sədri M.Abbaszadə müşavirə iştirakçılarının suallarına cavab vermişdir.
Bölmənin digər xəbərləri
