REGİONLAR
Tərtərdə 22 bələdiyyəyə 202 üzv seçiləcək
![Tərtərdə 22 bələdiyyəyə 202 üzv seçiləcək](/files/2019/3/1200x630/15742313235777134034_1200x630.jpg)
Tərtər, 20 noyabr, Tahir Ağaməmmədov, AZƏRTAC
95 saylı Tərtər seçki dairəsində bələdiyyə seçkilərinə hazırlıq işləri Mərkəzi Seçki Komissiyasının təsdiq etdiyi “Azərbaycan Respublikasında bələdiyyə seçkilərinin hazırlanıb keçirilməsi üzrə əsas hərəkət və tədbirlərin təqvim planı”na uyğun davam etdirilir.
Dairə seçki komissiyasının sədri Həmid Mehdiyev AZƏRTAC-ın bölgə müxbirinə bildirib ki, dairə üzrə 22 bələdiyyəyə, ümumilikdə, 202 bələdiyyə üzvü seçiləcək. Hazırda bələdiyyə üzvlüyünə namizədlərin irəli sürülməsi, qeydə alınması və imza vərəqələrinin qaytarılması prosesi davam edir. Bu günədək 666 nəfərin namizədliyi irəli sürülüb. Onlardan 202 nəfəri Yeni Azərbaycan Partiyasını, 9 nəfəri “Ana Vətən”, 3 nəfəri “Ümid” partiyalarını təmsil edir. 452 nəfərin namizədliyi öz təşəbbüsləri ilə irəli sürü lüb.
Komissiya sədri deyib ki, seçki prosesinin tam şəffaf və demokratik şəraitdə keçməsi üçün bütün seçki məntəqələri lazımi texniki vasitə və metodiki vəsaitlərlə, yanğın təhlükəsizliyi, fasiləsiz rabitə və elektrik enerjisi ilə təchiz olunub. Məntəqə seçki komissiyalarının sədrləri, DSK-nın üzvləri üçün seminar-treninqlər keçirilib. Dairənin tərkibinə daxil olan 38 seçki məntəqəsi üzrə 38 min 172 seçici qeydə alınıb. Onlardan 822 nəfəri ilk dəfə olaraq seçki hüququndan istifadə edəcək gənclərdir. Seçicilərin 1207 nəfəri 80-100 yaş arasında, 11 seçicinin yaşı isə 100-dən yuxarıdır. 1910-cu ildə anadan olmuş Səkinə Quliyeva və Səriyyə Cavadova rayonun ən yaşlı seçiciləridirlər.