Teymur Rəcəbov: Şahmat millimizin üzvləri arasındakı mehribanlığı digər komandalarda görmək mümkün deyil
Şəmkir, 1 aprel, Səxavət Quliyev, AZƏRTAC
Aprelin 1-də Vüqar Həşimovun xatirəsinə həsr olunan “Shamkir Chess 2019” turnirinin ikinci turunda Azərbaycan şahmatçıları Şəhriyar Məmmədyarov və Teymur Rəcəbov heç-heçə ediblər.
AZƏRTAC xəbər verir ki, Teymur Rəcəbov partiyadan sonra təşkil olunan mətbuat konfransında deyib: “Bəzən şahmatçı oyuna yaxşı hazırlaşsa da, rəqibin bir gedişi onu heç-heçəyə razılaşmağa vadar edir. Bir-birimizi yaxşı tanıyırıq. Bəlkə də məhz bu səbəbdən belə alınır. Partiyada üstünlük görünmürdü, ona görə də risk etməyə ehtiyac yox idi”.
Dünya çempionatlarında da tez-tez heç-heçələrin qeydə alındığını bildirən şahmatçı bunun normal hal olduğunu söyləyib: “Bütün oyunlarda ardıcıl heç-heçə qeydə alınsa, hansısa problemin olduğunu düşünmək mümkündür. Ancaq belə turnirlərdə heç-heçənin olmasında qeyri-adi heç nə yoxdur. Qolf və ya tennisdə də bərabərlik olur. Bütün idman növlərində heç-heçələr qeydə alınır. Amma şahmatda belə nəticə çox müzakirə edilir. Son zamanlar daha çox heç-heçələrdən danışılır. Əlbəttə, qələbə olanda daha maraqlı olur. Bununla belə şahmatçıları anlamaq lazımdır. Çünki heç-heçələr qaçılmazdır”.
T.Rəcəbov digər ölkələrdən olan zəka sahibləri və milli komandamızın üzvləri ilə qarşılaşan zaman eyni hissləri keçirmədiyini bildirib: “Şəhriyarla yaxşı münasibətimiz var. Bir-birimizlə məsləhətləşib, müzakirələr edirik. Milli komandada oynayan zaman hamımız bir-birimizi nəzərə alıb mübarizə aparırıq. Udsaq da, uduzsaq da bir-birimizin yanında oluruq. Bu da ölkəmizə uğurlar qazandırmağımıza səbəb olur. Şahmat millimizin üzvləri çox mehribandırlar. Hətta beynəlxalq turnirdə belə bir-birimiz üzərində qazanılan qələbəyə görə o qədər də sevinmirik. Şəhriyarla uzun illərdir davam edən dostluq münasibətimiz var. Bu münasibəti futbolla müqayisə etmək olmaz. Məsələn futbolda bir ulduz olur, hamı onun üçün oynayır. Bizdə isə hamı bir hədəf uğrunda yarışır. Lazım gələndə debütlərimizi bölüşürük, bəzən məsləhət alırıq. Digər komandalarda belə vəziyyəti görmək mümkün deyil”.
Klublararası Avropa çempionatında iştirak etmək üçün həvəsli olmadığını, bu yarışda iki dəfə qalib gəldiyini vurğulayan şahmatçımız deyib: “SOCAR Azərbaycan” klubunun heyətində iki dəfə Avropa Çempionlar Kubokunda qələbə qazanmışam. Altı dəfə bu yarışda iştirak etmişəm. Ona görə də indi bu turnir mənə o qədər də cəlbedici görünmür”.
Bölmənin digər xəbərləri
