ADNSU-da respublika fənn olimpiadalarının təbiət fənləri üzrə qalibləri mükafatlandırılıb
Bakı, 11 iyun, AZƏRTAC
Azərbaycan Dövlət Neft və Sənaye Universitetində (ADNSU) respublika fənn olimpiadalarının təbiət fənləri üzrə qaliblərinin mükafatlandırılması mərasimi keçirilib.
ADNSU-dan AZƏRTAC-a bildirilib ki, tədbirdə elm və təhsil nazirinin müavini Həsən Həsənli olimpiada qaliblərini təbrik edərək onların gələcəyin alimləri, ölkənin inkişafına töhfə verəcək, yeni kəşflərə imza atacaq və cəmiyyətin tərəqqisində mühüm rol oynayacaq gənclər olduğunu vurğulayıb. Həsən Həsənli qeyd edib ki, son illər Respublika Fənn Olimpiadalarının qaliblərinin nüfuzu həm ölkə daxilində, həm də beynəlxalq müstəvidə daha da artıb. Nazir müavini çıxışında qaliblərin gələcək fəaliyyətinə də toxunaraq bildirib ki, onların bu gün nümayiş etdirdiyi bilik, bacarıq və keyfiyyətlər gələcək uğurlarının əsasını təşkil edir.
ADNSU-nun rektoru dosent Rüfət Əzizov qalibləri təbrik edib, bu il respublika fənn olimpiadalarında ölkənin müxtəlif məktəblərindən 70 mindən çox şagirdin iştirak etdiyini diqqətə çatdırıb. Rektor qeyd edib ki, bu göstərici Azərbaycanda güclü olimpiada hərəkatının formalaşmasının, şagirdlərin bilik yarışlarına marağının, müəllimlərin onların hazırlığına göstərdiyi diqqətin və məktəblərdə bu istiqamətdə yaradılan inkişaf mühitinin bariz göstəricisi kimi dəyərləndirilə bilər. Rüfət Əzizov, həmçinin vurğulayıb ki, əgər bir vaxtlar beynəlxalq olimpiadalarda medal qazanmaq böyük hadisə kimi qiymətləndirilirdisə, bu gün Azərbaycan şagirdlərinin beynəlxalq arenada əldə etdikləri uğurlar artıq gözlənilən nəticəyə çevrilib. O bildirib ki, bu nailiyyətlər təsadüfi deyil, təhsil sahəsində uzun illər ərzində həyata keçirilən sistemli və məqsədyönlü fəaliyyətin məntiqi nəticəsidir.
Tədbirin rəsmi hissəsindən sonra təbiət fənləri üzrə qaliblərə mükafatlar təqdim edilib.
Qeyd edək ki, 2025/2026-cı tədris ili üzrə keçirilən respublika fənn olimpiadalarında ümumilikdə 73 min 193 nəfər şagird iştirak edib. İştirakçı aktivliyi daha çox riyaziyyat (20 min 26 nəfər) və Azərbaycan dili və ədəbiyyat (18 min 835 nəfər) fənləri üzrə müşahidə olunub. Fizika fənni üzrə isə 4 min 389 şagirdin iştirakı qeydə alınıb. İştirakçıların 40 min 269 nəfəri qız, 32 min 924 nəfəri oğlan olub. Olimpiadada ümumilikdə 94 nəfər qızıl, 169 nəfər gümüş və 257 nəfər bürünc medal qazanıb.
Bölmənin digər xəbərləri
