Rusiya məhkəməsi Azərbaycanın beynəlxalq axtarışa verdiyi şəxsi həbs edib
Moskva, 11 iyun, AZƏRTAC
Rusiyanın Sankt-Peterburq məhkəməsi 20 ildən çoxdur beynəlxalq axtarışda olan Yusif Naruddin oğlu Əliyev barəsində həbs qətimkan tədbiri seçib. O, Azərbaycana ekstradisiyası ilə bağlı qərar çıxarılana qədər həbsdə qalacaq.
AZƏRTAC Sankt-Peterburq Məhkəmələrinin birləşmiş mətbuat xidmətinə istinadla xəbər verir ki, bu barədə şəhərin Vasileostrovski Rayon Məhkəməsi qərar verib.
Məhkəmənin məlumatına görə, Yusif Əliyev Azərbaycan hakimiyyəti tərəfindən banditizm, qanunsuz həbs, soyğunçuluq və qanunsuz silah ticarəti ittihamları ilə axtarışa verilib.
Cinayət işi materiallarına görə, o, 1990-cı illərdə Azərbaycanda ağır cinayətlər törətməkdə, xüsusilə, silahlı dəstənin tərkibində adam oğurluğu və külli miqdarda pul tələb etməkdə ittiham olunur.
Yusif Əliyev iyunun 9-da Sankt-Peterburqda saxlanılıb. Mətbuat xidməti qeyd edib ki, beynəlxalq müqavilələrdə və Rusiya qanunvericiliyində nəzərdə tutulduğu kimi, onun Azərbaycan Respublikasının səlahiyyətli orqanlarına ekstradisiyasına heç bir maneə yoxdur.
Onun həbs müddəti 18 iyul 2026-cı ilə qədər təyin edilib.
Bölmənin digər xəbərləri
