TİKRİTDƏ “TƏMİZLƏMƏ” ƏMƏLİYYATI
AZƏRTAC-ın ərəb informasiya mənbələrindən aldığı xəbərə görə, noyabrın 8-nə keçən gecə ABŞ hərbi bölmələri İraqın keçmiş prezidenti Səddam Hüseynin doğma şəhəri Tikritdə “təmizləmə” əməliyyatı aparmışlar. Amerika komandanlığının nümayəndəsi bildirmişdir ki, əməliyyat nəticəsində heç kəsin yaşamadığı iki ev və yaraqlıların istifadə edə biləcəkləri anbar binası dağıdılmışdır. Bundan əlavə, Tikritdə orucluq ayı başlayarkən ləğv edilmiş komendant saatı yenidən bərpa olunmuşdur.
Bu tədbir “Blekhok” vertolyotundakı ABŞ-ın altı hərbi qulluqçusunun ölümünə cavab olaraq həyata keçirilmişdir. Vertolyotun raketlə vurulduğu güman edilir.
Təkcə son 7 gün ərzində İraqda 32 amerikalı əsgər həlak olmuşdur. Bu, Bağdadın alındığı vaxtdan bəri ABŞ ordusunun bir həftə ərzində verdiyi ən böyük itkidir.
Bölmənin digər xəbərləri
