TKTA Turizm və Menecment Universitetində xarici keyfiyyət təminatı üzrə təlimlər təşkil edib
Bakı, 21 oktyabr, AZƏRTAC
Təhsildə Keyfiyyət Təminatı Agentliyi (TKTA) ilə Azərbaycan Turizm və Menecment Universiteti (ATMU) arasında təlim sahəsində xidmətlərin göstərilməsi ilə bağlı imzalanmış əməkdaşlıq müqavilələri çərçivəsində oktyabr ayında TKTA-nın Keyfiyyət təminatı departamentinin Təlim və metodologiya şöbəsi tərəfindən universitetin inzibati struktur rəhbərləri və heyət üzvləri üçün xarici keyfiyyət təminatına dair təlimlər təşkil edilib.
TKTA-dan AZƏRTAC-a bildirilib ki, təlimlər müqaviləyə uyğun olaraq “Ali təhsil müəssisələrinin institusional akkreditasiyası üzrə qiymətləndirmə meyarları” və “İnstitusional akkreditasiya zamanı özünütəhlilin aparılması və hesabatın tərtibi qaydaları” adlı mövzuları əhatə edib.
Təlimlər zamanı ATMU-nun inzibati struktur rəhbərlərinə və heyət üzvlərinə institusional akkreditasiya çərçivəsi və “Ali təhsil müəssisələrinin institusional akkreditasiyası üzrə qiymətləndirmə meyarları”na uyğun olaraq istiqamət, meyar və indikatorlarla bağlı nümunələr və istinadlar gətirilərək geniş izahlar verilib və müvafiq olaraq heyət üzvlərinin sualları cavablandırılıb.
Eyni zamanda, ATMU-nun “akkreditasiyanın keçirilməsinə dair təşkilat komissiyası”nın üzvləri üçün “İnstitusional akkreditasiya zamanı özünütəhlilin aparılması və hesabatın tərtibi qaydaları” mövzusuna uyğun olaraq hesabatın tərtibinə qoyulan tələblər, qiymətləndirmədən öncə, qiymətləndirmə və qiymətləndirmədən sonrakı addımlarla bağlı təfsilatlı izahatlar verilib və müvafiq nümunələr gətirilib.
Qeyd edək ki, daxili və xarici keyfiyyət təminatı istiqamətində təlimlər təşkil etmək TKTA-nın Nizamnaməsinə əsasən onun fəaliyyət istiqamətlərindən biridir.
Bölmənin digər xəbərləri
