“Tokio 2020” Olimpiadasının təşkilat komitəsi yarışların təxirə salınması məsələsini müzakirə etmir
Tokio, 3 fevral, AZƏRTAC
Yaponiya Çində koronavirusun yayılması ilə əlaqədar Tokioda keçiriləcək Olimpiya və Paralimpiya Oyunlarının təxirə salınması məsələsini müzakirə etmir. Lakin cari həftə yarışlar zamanı yoluxucu xəstəliklərlə mübarizənin gücləndirilməsinə dair xüsusi toplantı keçiriləcək.
AZƏRTAC xəbər verir ki, bu barədə Olimpiya və Paralimpiya Oyunlarının təşkilinə məsul nazir Seyko Haşimoto fevralın 3-də parlamentin aşağı palatasında büdcə komissiyanın iclası zamanı çıxış edərkən bildirib.
Xanım nazir deyib: “Olimpiadanın təşkilat komitəsi yarışların təxirə salınması barədə məsələni müzakirə etməyəcək. Biz bütün gücümüzü sərf edib idmançıların öz qabiliyyətlərini nümayiş etdirməsi üçün əlverişli şərait yaradacaq, yarışların yüksək səviyyədə təşkilinə çalışacağıq. Yoluxucu xəstəliklərin yayılmasına qarşı mübarizənin əhəmiyyətini anlayaraq biz Dünya Səhiyyə Təşkilatı (DST) ilə sıx əlaqə saxlayırıq. Təşkilat komitəsinin üzvləri və digər əlaqədar qurumlarla birlikdə cari həftə ərzində yoluxucu xəstəliklərlə mübarizəyə həsr olunacaq iclas keçirməyi planlaşdırmışıq”.
Xatırladaq ki, Olimpiya Oyunları iyulun 24-dən avqustun 9-dək, Paralimpiya Oyunları isə avqustun 25-dən sentyabrın 6-dək Tokioda keçiriləcək.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
