Tolerantlıq Evində "Bir Vətən, bir ürək!" adlı tədbir keçirilib
Bakı, 26 sentyabr, AZƏRTAC
Sentyabrın 26-da Qafqaz Müsəlmanları İdarəsinin (QMİ) nəzdində fəaliyyət göstərən Tolerantlıq Evində 27 Sentyabr - Anım Günü ilə əlaqədar "Bir Vətən, bir ürək!" adlı tədbir olub.
AZƏRTAC xəbər verir ki, tədbirdə QMİ-nin nümayəndələri, Azərbaycanda fəaliyyət göstərən dini konfessiyaların rəhbərləri, dini icmaların nümayəndələri, şəhid ailələrinin üzvləri, qazilər, tələbələr və başqaları iştirak ediblər.
Tədbirdə çıxış edən Tolerantlıq Evinin direktoru Fatma Paşazadə sentyabrın 27-nin Azərbaycan tarixində xüsusi bir gün olduğunu vurğulayıb. “Ali Baş Komandan, Prezident İlham Əliyevin müdrik siyasəti və dəmir iradəsi, həmçinin igid oğulların qəhrəmanlığı və fədakarlığı sayəsində bu gün azad, güclü və qalib xalq kimi yaşayırıq. Bu tədbirdə müxtəlif dini icmaların nümayəndələrinin də bir araya gəlməsi böyük məna daşıyır. Çünki Azərbaycanda müxtəlif icmaların üzvləri bir ailə kimi yaşayırlar. Vətən müharibəsində də onlar bir araya gəldilər. Bununla bir daha dünyaya nümayiş etdirdik ki, Azərbaycan tolerant ölkədir", - deyə o diqqətə çatdırıb.
Daha sonra Vətən müharibəsinin ildönümü münasibətilə videoçarx nümayiş etdirilib.
QMİ sədrinin müavini Fuad Nurullayev çıxışında Vətən sevgisindən danışıb: "Azərbaycan övladları Vətən müharibəsində dini mövqeyindən asılı olmayaraq, “Dəmir yumruq” ətrafında birləşdilər. Şəhidlər adlarını tarixə yazdılar. Şəhidlər öləndə deyil, yad edilməyəndə unudulurlar. Buna görə də onların xatirəsini daim yaşatmalıyıq".
Dağ Yəhudiləri İcmasının sədri Milix Yevdayev şəhidlərin ruhunun Tanrının dərgahında ən yüksək zirvədə olduğunu vurğulayıb. "Dünyada Günəşin və ölümün üzünə dik baxmaq olmur. Şəhidlər isə ölümün üzünə dik baxan insanlardır. Buna görə də onlara şəhidlik zirvəsi verilib. Ulu Öndər Heydər Əliyev həmişə qeyd edirdi ki, azadlıq elə bir nemətdir ki, dünyanın qalan nemətləri onun yanında su qiymətinədir. Azadlığımız təmin olundu, bizə möhtəşəm Qələbə bəxş edildi. Beləliklə də, kimliyimizi bütün dünyaya tanıda bildik. Dünya indi bilir ki, Azərbaycan xalqı nələrə qadirdir. Biz əcdadlarımıza minnətdar olmalıyıq ki, bizə belə gözəl məkanı Vətən seçiblər", - deyə o vurğulayıb.
Bakı və Azərbaycan Yeparxiyasının yepiskopu Aleksiy (Smirnov) çıxışında Vətən müharibəsinin Azərbaycanın ərazi bütövlüyü ilə nəticələndiyini xatırladıb: "Azərbaycan hər zaman multikultural ölkə olub. Burada dini icmaların nümayəndələri sülh və əmin-amanlıq şəraitində bir ailə kimi yaşayırlar. Bundan sonra da bütün çətin anlarda bir yerdə olacağıq".
QMİ-nin qazisi Surxay Məmmədli çıxışında Vətən yolunda şəhid olanların ali zirvəyə çatdığını, şəhidliyin çox böyük anlayış olduğunu qeyd edib.
Azərbaycan Katolik kilsəsinin Apostol Prefekturasının mətbuat katibi Toral Ağayev çıxışında 2020-ci ildə Vətən müharibəsinin başladığı gündə hamının bir araya gəldiyini xatırladıb: "Müxtəlif dini icmaların üzvlərinin bir yerdə olmasını hamı gözləmirdi. Azərbaycan xalqı, onun rəhbərliyi bütün planları alt-üst etdi. Hamıya nümayiş etdirdik ki, müxtəliflik həqiqətən də bir güc mənbəyi, amili ola bilər. Müharibə başlayan andan katolik kilsəsi olaraq ədalətli sülh üçün dua edirdik".
Tədbirdə şəhid mayor Vüsal Əliyevin qardaşı Elyar İslamoğlu, şəhid leytenant Teymur Əzimovun həyat yoldaşı Zeynəb Səmədova, şəhid İmran Qurbanovun anası Sədaqət Qurbanova, şəhid Bədrəddin Quliyevin həyat yoldaşı Nataliya Quliyeva, şəhid polkovnik-leytenant Mürşüd Rəhimovun ailə üzvü, qazilər Şiraz Həsənov və Vüsal Həsənov iştirak ediblər.
Tədbirdə çıxış edən qazi Şiraz Həsənov döyüş xatirələrindən bəhs edib, iki dəfə yaralandığını bildirib: "Şuşanı düşməndən azad etdik. Beş gün ac-susuz döyüşdük. “Şuşa əməliyyatı” dünyanı lərzəyə gətirdi. Hamı bu əməliyyatdan danışır", - deyə o diqqətə çatdırıb.
Elyar İslamoğlu isə bildirib ki, ölkəmizdə dinindən, dilindən asılı olmayaraq hər kəs bərabər yaşayır: "Bu ölkənin şəhidləri əbədiyaşardır. Bundan sonra da fərqli dinlərə malik insanlar ölkəmizdə birlik, bərabərlik içərisində rahat yaşayacaqlar".
Zeynəb Səmədova, Nataliya Quliyeva da çıxışlarında Vətən sevgisindən və şəhidlik zirvəsinin ucalığından bəhs ediblər.
QMİ sədrinin müavini, İrəvan qazısı Bəxtiyar Nəcəfov da çıxışında haqq yolunda can fəda etməyin qürurverici hal olduğunu vurğulayıb. O, Prezident İlham Əliyevin və birinci xanım Mehriban Əliyevanın daim şəhid ailələrinin yanında olduğunu qeyd edib.
Tədbirin sonunda şəhidlərin ruhuna dualar oxunub.
Bölmənin digər xəbərləri
