CƏMİYYƏT
Transyağ turşularının tənzimlənməsi ilə bağlı qaydalar Hüquqi Aktların Dövlət Reyestrinə daxil edilib
Bakı, 20 fevral, AZƏRTAC
Qida Təhlükəsizliyi Agentliyinin müvafiq qərarı ilə təsdiq olunan “Yaxılabilən yağlarda və qatı yağlarda transyağ turşularının tənzimlənməsinə dair sanitariya norma və qaydası” Hüquqi Aktların Dövlət Reyestrinə daxil edilib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, qaydaya əsasən, yaxılabilən və qatı yağlarda transyağ turşularının miqdarı (heyvan mənşəli yağlarda və piylərdə təbii halda yaranan transyağ turşuları istisna olmaqla) məhsulun ümumi yağ tərkibinin 2 faizindən çox olmamalıdır. Qayda kərə yağına və süd yağı əsaslı yağlara şamil edilmir.
Qeyd edək ki, “Yaxılabilən yağlarda və qatı yağlarda transyağ turşularının tənzimlənməsinə dair sanitariya norma və qaydası” qüvvəyə mindikdən sonra qida subyektləri tərəfindən müvafiq məhsulların həmin tələblərə uyğunluğu 6 ay müddətində təmin olunmalıdır.
“Yaxılabilən yağlarda və qatı yağlarda transyağ turşularının tənzimlənməsinə dair sanitariya norma və qaydası” ilə https://e-qanun.az/framework/53576 linki vasitəsilə tanış olmaq mümkündür.