TÜRKİYƏNİN KƏRKÜK SİYASƏTİ DƏYİŞMƏZDİR
AZƏRTAC-ın xüsusi müxbiri xəbər verir ki, Türkiyənin Xarici İşlər Nazirliyi İraq parlamentində Kərküklə bağlı müzakirələrin davam etdiyi bir zamanda burada gərginliyin artması ilə bağlı bəyanat yaymışdır.
Bəyanatda deyilir ki, Ankara Kərkükdə getdikcə artan gərginliyi diqqətlə və narahatlıqla izləyir. Kərkük vilayətinin məclisindəki kürdlərin mətbuat konfransı təşkil edərək, bu vilayəti də İraqın şimalındakı kürd idarəçiliynə tabe etdirilməsi ideyasını irəli sürmələri və Türkiyənin buna etiraz etmədiyi barədə yayılan bəyanatlar yersizdir.
Türkiyənin hər zaman Kərkükdəki müxtəlif etnik qrupların birgə və dinc yanaşı yaşamasının tərəfdarı oluğu qeyd edilən bəyanatda bildirilir ki, rəsmi Ankaranın mövqeyi bu vilayətin xüsusi statusla və ədalətli şəkildə idarə olunmasıdır. Əvvəllər də bəyan edilmiş bu siyasət dəyişməzdir. Kərküklə bağlı gərginliyin artırılması heç kimə fayda gətirməyəcəkdir.
Türkiyə bir daha buradakı bütün tərəfləri dialoqa və konsensusa dəvət edir. Düşünülmüş addımlar İraqda sabitliyin və sülhün bərqərar olmasında mühüm rol oynayacaqdır.
Bölmənin digər xəbərləri
