TÜRKMƏNİSTANDA PREZİDENTİN SƏLAHİYYƏT MÜDDƏTİ 5 İLDƏN 7 İLƏDƏK ARTIRILACAQ
AZƏRTAC xəbər verir ki, Türkmənistan Konstitusiyasının yeni redaksiyasında prezidentin səlahiyyət müddətinin 5 ildən 7 ilədək artırılması nəzərdə tutulur. Mayın 22-də ölkə ictimaiyyətinin bu təklifini Məclisin (parlamentin) sədri Ağca Nurberdıyeva konstitusiya komissiyasının iclasında səsləndirmişdir. İclas Prezident Qurbanqulu Berdiməhəmmədovun sədrliyi ilə keçirilmişdir.
Nurberdıyeva təklifləri yekunlaşdıraraq bildirmişdir ki, onların bir çoxu Xalq məsləhətinin - ölkənin ali nümayəndələr orqanının səlahiyyətlərinin parlamentə verilməsinə aiddir. İndiki konstitusiyaya müvafiq olaraq Xalq məsləhəti qanunvericilik funksiyalarını da icra edir. Məclis deputatlarının sayını 65-dən 125-dək artırmaq təklif edilmişdir.
Berdiməhəmmədov Məclisdə çıxış edərək demişdir: “Konstitusiyanın ilk redaksiyaları müstəqil Türkmənistanın təşəkkülü, ölkədə prezident vertikalının qurulması məsələlərinə cavab verirdi. Onlar da öz funksiyasını yerinə yetirmişdir. “Bəzi maddələr artıq köhnəlmişdir, bu da iqtisadiyyatda və sosial sahədə əsaslı islahatların keçirilməsini ləngidir. Dövlət mexanizmini dəyişmək zərurəti meydana çıxmışdır, bu mexanizm müasir vəzifələlərə cavab verməlidir. Yalnız parlamentin qanunlar qəbul etmək hüququ olmalıdır”.
Bölmənin digər xəbərləri
