U-23 Avropa çempionatında ölkəmizi 8 yunan-Roma güləşçisi təmsil edəcək
Bakı, 1 mart, AZƏRTAC
Martın 4-dən 10-dək Serbiyanın Novi Sad şəhərində 23 yaşadək güləşçilər arasında Avropa çempionatı keçiriləcək.
AZƏRTAC Azərbaycan Güləş Federasiyasına istinadla xəbər verir ki, qitə birinciliyinin ilk 3 günündə yunan-Roma güləşçiləri mübarizə aparacaqlar. Bu məqsədlə müvafiq komandamız martın 2-də Serbiyaya yollanacaq.
Yığmamızın böyük məşqçisi Rövşən Bayramov və məşqçisi Emin Əhmədovun rəhbərliyi altında 8 güləşçi ilin ilk ciddi sınağına çıxacaq. Heyətdə Ziyad Zeynalov (55 kq), Mikayıl Rəhmanov (60 kq), İslambek Dadov (72 kq), Nəsir Həsənov (77 kq), Eltun Vəzirzadə (82 kq), Nəzərşah Fətullayev (87 kq), Arif Niftullayev (97 kq) və Sərxan Məmmədov (130 kq) yer alıblar.
Qeyd edək ki, növbəti həftənin ilk günlərində sərbəst və qadın güləşi üzrə millilərimizin də heyəti açıqlanacaq.
Bölmənin digər xəbərləri
