ÜAK TƏŞKİLATIN İNKİŞAF PERSPEKTİVLƏRİNİ MÜZAKİRƏ EDİR
Ümumrusiya Azərbaycan Konqresindən (ÜAK) AZƏRTAC-ın xüsusi müxbirinə bildirmişlər ki, ÜAK-ın prezidenti Məmməd Əliyev Konqresə daxil olan regional təşkilatların rəhbərləri ilə Dünya azərbaycanlılarının II qurultayının yekunlarına dair müşavirə keçirmişdir. Müşavirə zamanı təşkilatın fəaliyyətinin müxtəlif cəhətlərinə toxunulmuş, ÜAK-ın icraçı direktoru Eldar Quliyevin “Azərbaycan Konqresi” qəzetinin yayılmasının fəallaşdırılmasına dair tədbirlər barədə, İqtisadi İnkişaf Fondu idarə heyətinin sədri və ÜAK-ın vitse-prezidenti Natiq Ağamirovun fondun layihələri və perspektivləri barədə, habelə təşkilatın icraçı direktorunun birinci müavini Gündüz Həmzəyevin ÜAK-ın möhkəmləndirilməsi barədə məruzələri dinlənilmişdir.
Konqresin regional bölmələrinin rəhbərləri ictimai işin mühüm problemlərinə diqqəti cəlb etmiş, qurumların fəaliyyətinin möhkəmləndirilməsinə yönəldilən təklif və tövsiyələrini bildirmişlər. Miqrasiya prosesləri, vətəndaşlıqla bağlı və digər sənədlərin qeydə alınmasında həmvətənlərimizə hüquqi yardım göstərilməsi məsələləri müzakirə olunmuşdur.
M.Əliyev iştirakçıların diqqətini Konqresin təşkilatca möhkəmlənməsi və inkişafının, diasporumuzun daha sıx birləşməsinin zəruriliyinə yönəltmişdir.
Bölmənin digər xəbərləri
