“Üç alov” beynəlxalq yaradıcılıq festivalına start verilir
Bakı, 7 may, AZƏRTAC
Təhsil Nazirliyi Respublika Uşaq-Gənclər İnkişaf Mərkəzi tərəfindən mayın 7-dən iyunun 1-dək “Üç alov” beynəlxalq folklor, klassik və müasir yaradıcılıq festivalı keçirilir.
Nazirlikdən AZƏRTAC-a bildirilib ki, yeni koronavirus infeksiyası ilə bağlı tətbiq edilən karantin rejimi ilə əlaqədar onlayn platformada keçirilən festivalın məqsədi Azərbaycan və xarici ölkələrin adət-ənənə və zəngin mədəni irslərinin öyrənilməsi, qorunub saxlanması və inkişafı, ənənəvi, folklor, klassik, müasir incəsənətin müxtəlif istiqamətləri üzrə uşaq və gənclərin cəlb edilməsi, xarici ölkələrin kollektivləri ilə yaradıcılıq nailiyyətlərinin mübadiləsi, incəsənət sahəsində istedadlı və perspektivli uşaq və gənclərin aşkara çıxarılması və onların bədii-estetik səviyyəsinin yüksəldilməsidir.
Təhsil Nazirliyi sistemində fəaliyyət göstərən ümumtəhsil məktəblərinin şagirdləri, məktəbdənkənar təhsil müəssisələrinin dərnək üzvləri, rəqs kollektivləri, rəqqaslar, musiqiçilər, özfəaliyyət yaradıcılıq kollektivlərinin üzvləri arasında keçirilən festival 3 yaş qrupunda (9-11, 12 -14, 15 -17) aşağıdakı nominasiyaları əhatə edir:
-İnstrumental yaradıcılıq: milli, klassik, estrada, caz;
-Vokal yaradıcılığı: milli vokal, akademik vokal, estrada vokal;
-Xoreoqrafiya yaradıcılığı: milli rəqslər, milli stilizasiya, klassik rəqs, estrada rəqsi, müasir rəqs (caz, müasir, kontemp, çivi, step və s.), müasir rəqs (hip-hop, brek-dans, robot rəqsi), müasir eksperimental rəqs, bal rəqsləri, müasir və klassik balet.
İştirakçılar festivala müxtəlif yaş qrupları üzrə tək (solo), cüt (duet) və kollektiv (qrup) qatıla bilərlər. İştirakçı yalnız bir nominasiya üzrə iştirak edə və həmin nominasiya üzrə bir nömrədən ibarət videoçarx təqdim edə bilər.
Festivalda iştirak etmək istəyənlər ərizə formasını mayın 20-dək [email protected] ünvanına göndərməlidirlər. Qeydiyyat zamanı bütün videoçarxlarda iştirakçının adı, soyadı, təmsil etdiyi müəssisənin adı, ifa etdiyi mahnının (rəqsin və s.) adı, müddəti qeyd edilməlidir. Bütün nominasiyalar üzrə ifa müddəti 1-3 dəqiqədən artıq olmamalıdır.
Festivalın beynəlxalq mərhələsi iyunun 1-3-də keçiriləcək.
Qaliblər Qran-Pri, diplom, kubok və medallarla mükafatlandırılacaq.
Bölmənin digər xəbərləri
