Üç gün ərzində Hacıqabul rayonunun 2561 sakini tibbi müayinədən keçmişdir
Hacıqabul, 19 fevral (AZƏRTAC). Azərbaycan Prezidenti İlham Əliyevin tapşırığına əsasən respublikamızın bütün rayonlarında olduğu kimi, Hacıqabulda da əhalinin tibbi müayinədən keçirilməsi uğurla davam etdirilir.
AZƏRTAC xəbər verir ki, əhalinin sağlamlığının qorunmasına yönələn bu mühüm aksiyanın mütəşəkkil keçirilməsi üçün rayon icra hakimiyyəti başçısının sərəncamı ilə komissiya yaradılmış, tibb müəssisələrində dəqiq iş qrafiki tərtib olunmuşdur.
Komissiyanın sədri, rayon icra hakimiyyəti başçısının müavini Zeynəb Əsgərova AZƏRTAC-a bildirmişdir ki, yüksək ixtisaslı, təcrübəli tibb işçilərindən ibarət həkim briqadası tərəfindən aksiyanın birinci günü 731, ikinci günü 904, üçüncü günü isə 926 sakin müayinədən keçirilmişdir. Xəstəlik aşkar edilən şəxslərin rayon Mərkəzi Xəstəxanasında, yaxud Bakıda müalicəsi təşkil olunacaqlar.
Tibbi müayinədən keçən 56 yaşlı Hacıqabul şəhər sakini Səfurə Həsənova AZƏRTAC-a müsahibəsində yaradılan şəraitdən, işin təşkilindən razılığını bildirərək demişdir: “Həkimlər məni hərtərəfli müayinədən keçirib ürəyin işemik xəstəliyi, gərginlik stenokardiyası aşkar etdilər. Elə həmin gün müalicəyə cəlb olundum. Sağlamlığımıza göstərilən yüksək diqqət və qayğıya görə ölkə prezidenti İlham Əliyevə ürəkdən minnətdarıq”.
Bölmənin digər xəbərləri
