ÜÇÜNCÜ ÇAĞIRIŞ MİLLİ MƏCLİSİN BİR İLLİK FƏALİYYƏTİNİN YEKUNLARINA HƏSR OLUNMUŞ MƏTBUAT KONFRANSI KEÇİRİLMİŞDİR
Mətbuat konfransını aparan Milli Məclis sədrinin müavini Bahar Muradova parlamentin bir illik fəaliyyəti barədə məlumat vermişdir. Bildirilmişdir ki, yeni seçilmiş Milli Məclis ölkənin inkişafında mühüm rol oynamışdır. Yeni qanunlar qəbul olunmuş, parlamentin beynəlxalq fəaliyyəti möhkəmlənmişdir. Dünya birliyinə sürətlə inteqrasiya edən bir ölkə kimi Azərbaycanda qanunun aliliyi təmin olunur, bütün sahələrdə islahatlar aparılır.
B.Muradova vurğulamışdır ki, ötən bir ilin ən əlamətdar hadisəsi Azərbaycan Prezidenti İlham Əliyevin Milli Məclisdə deputatlar qarşısında çıxışı olmuşdur. Dövlətimizin başçısı ölkənin qanunverici orqanının fəaliyyətinə qiymət vermiş, tövsiyələrini söyləmişdir.
Parlament sədrinin müavini demişdir ki, ötən dövr ərzində Milli Məclisin 30 iclası keçirilmiş, 186 qanun, o cümlədən 1 Konstitusiya qanunu, Konstitusiya qanununa əlavələr və dəyişikliklər haqqında 3 qanun, 70 qanun və qanunlara əlavələr və dəyişikliklər haqqında 71 qanun qəbul edilmişdir. Ölkəmizdə qanunların tətbiqi mexanizmi də təkmilləşir. Parlament bu istiqamətdə də fəal iş aparır. Deputat-seçici əlaqələri möhkəmlənir. Deputatlar tez-tez bölgələrdə olur, seçicilərlə görüşür, onların qaldırdıqları məsələlərin həlli üçün icra hakimiyyəti orqanları ilə sıx əlaqə saxlayırlar.
Milli Məclisdə xarici ölkələrin 100-ə yaxın nümayəndəsi olmuşdur. Onların arasında prezidentlər, parlamentlərin başçıları, ölkəmizdə akkreditə olunmuş səfirlər, beynəlxalq təşkilatların nümayəndələri vardır. Azərbaycan parlamentinin deputatları da xarici ölkələrə səfərlər etmiş, bir çox dövlətlərin parlamentləri ilə dostluq əlaqələri yaratmışlar. Deputat qrupları ATƏT, Avropa Şurası, NATO parlament assambleyalarının işində iştirak etmişlər. Avropa Şurası Parlament Assambleyasında 2001-ci ildən hazırkı Prezident İlham Əliyevin rəhbərliyi ilə fəaliyyətə başlamış nümayəndə heyətimizin nümayiş etdirdiyi qətiyyətli mövqeyin indi də davam etməsi göstərir ki, Azərbaycan beynəlxalq aləmdə sözü dinlənilən dövlətə çevrilmişdir. Milli Məclis Fransa parlamentinin bu yaxınlarda uydurma “erməni soyqırımı” ilə bağlı qərarına ilk etirazını bildirən qurumlardan biri olmuşdur. Bu, dövlətimizin demokratiyanın, söz azadlığının qorunması istiqamətində atdığı mühüm addımlardandır.
B.Muradova xatırlatmışdır ki, parlamentdə dostluq qrupları fəaliyyət göstərir. Bu qrupların və müxtəlif ölkələrin parlamentlərindəki müvafiq qrupların üzvlərinin qarşılıqlı səfərləri rəsmi görüşlərdən heç də az fayda vermir. Milli Məclisin sədrinin başçılığı ilə parlament nümayəndə heyətləri bir çox xarici ölkəyə səfərlər etmişdir.
Sonra Bahar Muradova, Milli Məclis Aparatının rəhbəri Səfa Mirzəyev, daimi komissiyaların sədrləri jurnalistlərin suallarına cavab verdilər.
Bölmənin digər xəbərləri
