Ukrayna yazıçıları Tərcümə Mərkəzində olublar
Bakı, 6 iyun, AZƏRTAC
İyunun 6-da Ukrayna Yazıçılar Birliyinin sədri Vladimir Danilenkonun başçılığı ilə ukraynalı yazıçılardan ibarət nümayəndə heyəti Tərcümə Mərkəzində olub.
Mərkəzdən AZƏRTAC-a bildirilib ki, görüşdə son illər Azərbaycan-Ukrayna ədəbiyyatları arasında qurulan sıx əlaqələrdən, ötən il Ukraynada işıq üzü görmüş “Müasir Azərbaycan poeziyası”, həmçinin ölkəmizdə nəşr edilmiş “Ukrayna ədəbiyyatı antologiyası”ndan söz açılıb, bu nəşrlərin xalqlar arasında dostluq və qardaşlıq tellərinin möhkəmləndirilməsi istiqamətindəki əhəmiyyətindən danışılıb.
Azərbaycanda ilk dəfə qonaq olan Ukrayna yazıçıları Bakının müstəsna gözəlliyindən, xalqlarımız arasında doğmalığın dərin köklərindən danışıb, mövcud ədəbi əlaqələrin hər iki ölkənin ədəbiyyatına misilsiz töhfələr verdiyini bildiriblər.
Sonda yazıçılar qədim Kiyev memarlıq mədəniyyətinə həsr olunmuş nəfis tərtibatlı “Kiyev Sofiyası” kitabını Tərcümə Mərkəzinə hədiyyə ediblər.
Bölmənin digər xəbərləri
