ULU ÖNDƏR HEYDƏR ƏLİYEVİN ƏZİZ XATİRƏSİ DAİM UCA TUTULUR
AZƏRTAC xəbər verir ki, Dövlət Əmlakının İdarə Edilməsi üzrə Dövlət Komitəsində (DƏİEDK) ulu öndər Heydər Əliyevin 85 illik yubileyi münasibətilə “Heydər Əliyev və iqtisadi sıçrayışa yönəlmiş islahatlar» mövzusunda konfrans keçirilmişdir.
Komitənin foyesində ümummilli lider Heydər Əliyevin büstünün önünə tər çiçək dəstələri qoyulmuş, müasir Azərbaycan dövlətinin memarı və qurucusuna həsr olunmuş videofilm göstərilmişdir.
Tədbirdə DƏİEDK-in sədri Kərəm Həsənov qeyd etmişdir ki, mayın 10-u Azərbaycan tarixində unudulmaz və şərəfli gündür. Axı, həmin gün müasir Azərbaycan dövlətinin qurucusu ulu öndər Heydər Əliyev anadan olmuşdur. Azərbaycan xalqının ümummilli lideri Heydər Əliyev tariximizin yetirdiyi ən böyük şəxsiyyətlərdən biridir. Ulu öndər təkcə Azərbaycan xalqının deyil, bütün dünya xalqlarının və bəşəriyyətin tarixinə daxil olmuş qüdrətli siyasətçidir. Heydər Əliyevin 30 ildən artıq Azərbaycana rəhbərliyi dövründə ölkəmizin inkişafı və qüdrətlənməsi naminə gördüyü işlər xalqımız tərəfindən yüksək qiymətləndirilir. Bu illərdə xalqın ictimai-siyasi, iqtisadi və mədəni həyatının bütün sahələrində əldə edilmiş dirçəliş məhz ümummilli lider Heydər Əliyevin misilsiz xidmətinin bəhrəsidir. Heydər Əliyev ölkəmizə rəhbərlik etdiyi dövrdə Azərbaycanı bir dövlət kimi zamanın ağır və sərt sınaqlarından çıxara bilmişdir. Müdrik rəhbər öz uzaqgörən siyasəti ilə ölkənin gələcək inkişaf strategiyasını müəyyənləşdirmiş və onun həyata keçirilməsi üçün mühüm addımlar atmışdır. Ulu öndərin respublikamıza rəhbərliyi zamanı cəmiyyətin bütün sferalarında, o cümlədən iqtisadiyyat sahəsində aparılan islahatlar müstəqil dövlətçiliyimizin qüdrətlənməsinə zəmin yaratmışdır.
K.Həsənov ulu öndərin müəyyənləşdirdiyi və xalqımızı daha parlaq gələcəyə aparan hərtərəfli inkişaf yolunun hazırda Azərbaycan Prezidenti İlham Əliyev tərəfindən uğurla davam etdirildiyini vurğulamışdır. Prezident İlham Əliyevin rəhbərliyi ilə ölkəmizdə aparılan genişmiqyaslı islahatlar, həyata keçirilən iri transmilli layihələr, Bakı-Tbilisi-Ceyhan əsas neft ixrac boru kəmərinin, Bakı-Tbilisi-Ərzurum qaz kəmərinin istifadəyə verilməsi, Bakı-Axalkalaki-Qars dəmir yolu xəttinin çəkilməsi və digər layihələr Azərbaycanı bütün dünyada müstəqil siyasət yürüdən və inkişaf edən ölkələr sırasına çıxarmışdır. Bölgədə heç bir regional layihə Azərbaycanın iştirakı olmadan həyata keçirilmir. Uğurlu islahatların sayəsində respublikamız bu gün artıq özü investisiya qoyan ölkəyə çevrilmişdir. Azərbaycan neftdən əldə olunan gəlirlərdən səmərəli istifadə edərək, müxtəlif ölkələrdə həyata keçirilən iri layihələrə qoşulur, gəlirli sahələrə investisiyalar yatırır. Ölkə daxilində infrastruktur sahələrinin yenidən qurulması, yolların çəkilməsi, sosial məsələlərin həll edilməsi, yeni məktəblərin və xəstəxanaların tikilməsi həyata keçirilir.
Milli Məclisin iqtisadi siyasət daimi komissiyasının sədri Ziyad Səmədzadə, deputat Xanhüseyn Kazımlı ümummilli lider Heydər Əliyev siyasi kursunun layiqli davamçısı Prezident İlham Əliyev tərəfindən davam etdirilən iqtisadi islahatların ölkədə makroiqtisadi göstəricilərin artmasına və büdcə daxilolmalarının çoxalmasına, yoxsulluğun azalmasına, yeni iş yerlərinin açılmasına, sahibkarlar təbəqəsinin güclənməsinə səbəb olduğunu diqqətə çatdırmışlar.
Natiqlər vurğulamışlar ki, bu kurs qarşıdan gələn illərdə də ölkəmizin daha sürətli sosial-iqtisadi inkişafını, əhalinin həyat səviyyəsinin daha da yüksəldilməsini təmin edəcəkdir.
Bölmənin digər xəbərləri
