Ülviyyə Ağayeva: Biz milli birliyin nəyə qadir olduğunu dünyaya bir daha göstərdik
Bakı, 17 avqust, AZƏRTAC
Otuz il idi ki, Azərbaycan torpaqları bəzi dövlətlərin havadarlığı, gizli təhrikləri və dəstəkləri sayəsində Ermənistanın təcavüz və işğalına məruz qalmışdı. Ən ağrılı və maraqlısı bu idi ki, dünya ictimaiyyəti, güclü dövlətlərin qurduğu Birləşmiş Millətlər Təşkilatı (BMT), Avropa İttifaqı kimi mötəbər qurumlar guya bu məsələni çözməyə, konflikti ədalətlə həll etməyə çalışırdılar. Ancaq görünən bu idi ki, BMT Təhlükəsizlik Şurasının qəbul etdiyi qətnamələri, Azərbaycanın beynəlxalq səviyyədə tanınan ərazi bütövlüyü yalnız kağız üzərində qalırdı. Otuz il ərzində bu, guya demokratik, humanist dövlətlər torpaqlarımızın işğal edildiyini görməzdən gəlir, ən çətin məqamlarda isə torpaqları işğal edilmiş və özünü qoruyan Azərbaycanla işğalçı Ermənistanı bərabərləşdirir, hər iki tərəfi sülhə çağırırdılar. Həm də bu nə zaman baş verirdi? Elə ki, Azərbaycan gücsüz olmadığını 1-2 cavab atəşi ilə göstərəndə... Özünü sivil dünya nümayəndələri kimi təqdim edən, dünyaya demokratiya dərsi deyənlər 30 il ərzində bu ədalətsizliyə necə göz yumurdular?
Bu sözləri AZƏRTAC-a açıqlamasında Milli Məclisin deputatı Ülviyyə Ağayeva söyləyib.
Güclü dövlətlərin ikili standartlarla fəaliyyət göstərdiklərinin heç kim üçün yeni xəbər olmadığını vurğulayan deputat deyib: “Ancaq İkinci Qarabağ - 44 günlük Vətən müharibəsi başlananda onlar az qala bunu dilləri ilə etiraf etdilər. Dünənə qədər hər şeyə göz yuman, gözləmə mövqeyi tutan dünya hegemonları erməni qardaşlarının burnu əzilən kimi və Azərbaycanın artıq heç bir danışıqları gözləməyəcəyini başa düşəndə əl-ayağa düşdülər, dərhal haqq-ədalətdən danışmağa, erməni xalqının “əzilməsindən”, tarixi abidələrin dağıdılmasından danışmağa başladılar. Özlərinin qəbul etdikləri və imzaladıqları sənədləri də bir kənara qoyaraq, utanmadan öz ərazi bütövlüyü uğrunda döyüşən xalqı ittiham etməyə başladılar”.
Ülviyyə Ağayeva qeyd edib ki, Ermənistan Azərbaycan torpaqlarını işğal edəndə, Xocalıda soyqırımı törədəndə, qədim tarixi abidələri, mənəvi dəyərləri dağıdanda, təhqir edəndə heç nə görmürdülər, indi qondarma bir “abidə” uçursa, xristian məbədinə bir güllə dəyirsə, bütün Qərb dünyasının mötəbər şəxsləri hərəkətə gəlir, narahatlıq bildirirlər. Əsl ikili standartlar, beynəlxalq ədalətdən danışarkən ədalətsizlik göstərmək nümunəsi Azərbaycana münasibətdə özünü büruzə verdi. Bu müharibə son sınaq oldu və biz bildiyimiz həqiqəti bir daha yaddaşımıza həkk etdik. Kimin kim olduğunu, dostumuzu, düşmənimizi bir daha dəqiqləşdirdik.
“Biz bütün dünyaya sübut etdik ki, lazım gələndə hər kəsə yerini göstərə bilərik, biz ancaq haqq tərəfdarı, sülhməramlı xalqıq, dövlətimizin ərazisində baş verən müvəqqəti çətinliklər və yeni quruculuq dövründəki siyasi çəkişmələr bizi zəiflətmişdi. Azərbaycan Vətən müharibəsinə başlayaraq əzəli torpaqlarını 44 gün ərzində işğalçılardan təmizləməklə tarixi ədaləti özü bərpa etdi. Müzəffər Ali Baş Komandan İlham Əliyevin söylədiyi kimi, biz BMT Təhlükəsizlik Şurasının qəbul etdiyi qətnamələri və Minsk qrupunun yerinə yetirməli olduğu işləri həyata keçirdik. Özünü demokratik, ədalətli dövlətlər hesab edən Qərb dünyası açıq söyləməsə də, yaxşı başa düşür ki, Azərbaycan müharibəni ləyaqətlə aparıb, mülki insanlara toxunmayıb, əsirlərlə Beynəlxalq Konvensiyalar çərçivəsində davranıb. Müharibədən sonrakı hadisələr də (erməni əsirlərin qaytarılması, Ermənistanın işğal etdikləri torpaqlarımızdan çıxıb getmələrinə verilən vaxtın uzadılması və sair) bunları sübut etdi. Bütün ikili standartlar, bizə qarşı yönəldilmiş ədalətsiz təbliğat və təzyiq kampaniyaları, dünyanın aparıcı jurnalistlərinin müsahibələrində Prezident İlham Əliyevə ünvanladıqları təxribatçı suallar Azərbaycanı haqq işindən döndərə bilmədi. Səbir kasası daşanda onu dayandırmaq olmaz. Düz 30 il bu ədalətsizlik qarşısında səbir, dözüm, ləyaqət nümayiş etdirdik. Hər dəfə Azərbaycan Prezidenti elan edirdi ki, biz qan tökmək istəmirik, biz sülh yolu ilə ədaləti bərpa etmək istəyirik, ancaq lazım gələrsə, silaha sarıla, güc nümayiş etdirə də bilərik. Belə də oldu. Dəmir yumruq düyünləndi, xalq bu yumruq ətrafında birləşdi, əqidəsi, yaşı, siyasi mövqeyindən asılı olmayaraq, hamı bir amala xidmət etdi və bu işdə xalqın barışmaz ruhu Qələbəmizin təmin olunmasında mühüm rol oynadı. Biz milli birliyin nə olduğunu, nəyə qadir olduğunu bütün dünyaya bir daha göstərdik”, - deyə Milli Məclisin deputatı vurğulayıb.
O əlavə edib ki, torpaqlarımızın işğaldan azad olunması xalq qarşısında, tarix qarşısında, gələcək nəsillər qarşısında bizim borcumuz idi və biz bu borcu şərəflə yerinə yetirdik və əminliklə deyə bilərik ki, gələcək nəsillər işimizi davam etdirəcək, bərpa etdiyimiz sərhədlərimizi, ərazi bütövlüyümüzü qoruyacaq. Biz onlara işğal altında qalaraq parçalanmış torpaqlarımızı miras qoymadıq, biz onlara məğlubluq sindromunu ötürmədik, biz onlara Zəfər ruhu aşılayırıq. Verdiyi bütün itkilərə, şəhidlərə baxmayaraq, bu gün xalqımız sevinir, qürurlanır, başını uca tutur. Xalqın sevincini görmək isə böyük xoşbəxtlikdir.
Bölmənin digər xəbərləri
