Ümummilli lider Heydər Əliyevin anadan olmasının ildönümü münasibətilə İndoneziyada anım tədbiri keçirilib
Cakarta, 8 may, AZƏRTAC
Ümummilli lider Heydər Əliyevin anadan olmasının 98-ci ildönümü münasibətilə Azərbaycanın İndoneziyadakı səfirliyində yerli KİV nümayəndələri ilə görüş keçirilib.
AZƏRTAC xəbər verir ki, İndoneziyanın mətbuat nümayəndələrini səfirlikdə salamlamaqdan məmnun olduğunu söyləyən səfir Cəlal Mirzəyev 10 may tarixinin Azərbaycan xalqının tarixində mühüm əhəmiyyət kəsb etdiyini söyləyib. Həmin günün ulu öndər Heydər Əliyevin anadan olduğu gün kimi tariximizə və xalqımızın yaddaşına yazıldığını bildirib. Heydər Əliyevin Azərbaycan xalqı üçün əvəzolunmaz xidmətlərini vurğulayan səfir Ümummilli Liderin fitri istedada malik olduğunu, uzaqgörən müdrik siyasəti ilə ölkəmizin inkişafına verdiyi töhfələrdən bəhs edib. Müasir Azərbaycan dövlətinin memarı olan Heydər Əliyevin, həmçinin 1969-1982-ci illərdə, keçmiş Sovet İttifaqı dövründə Azərbaycanın rəhbəri olarkən gördüyü böyük quruculuq işləri barədə də ətraflı məlumat verib. Ümummilli Liderimizin Sovet İttifaqı Kommunist Partiyası Mərkəzi Komitəsinin Siyasi bürosunda ilk və yeganə müsəlman rəhbər olduğunu xatırladan səfir Ulu Öndərin həmin illərdə Azərbaycan tarixinin, dilinin, mədəniyyətinin qorunmasında xüsusi əməyinin olduğunu söyləyib. Azərbaycan gənclərinin təhsilinə xüsusi diqqətlə yanaşan Heydər Əliyevin XX əsrin 70-ci illərində hər il iki min nəfərə qədər gənci müxtəlif ixtisaslara yiyələnmək üçün SSRİ-nin ayrı-ayrı şəhərlərində yerləşən ali təhsil müəssisələrinə göndərməsi, müxtəlif maneələrə baxmayaraq, həmin dövrdə Cəmşid Naxçıvanski adına Hərbi Məktəbi açması, 1978-ci il Konstitusiyasında Azərbaycan dilinin dövlət dili kimi təsbit olunması və bu kimi digər nəcib, Azərbaycanın gələcək müstəqilliyinə hesablanmış addımlar atması barədə ətraflı danışıb.
Dövlət müstəqilliyimizin bərpası istiqamətində ilk addımların məhz Heydər Əliyevin rəhbərliyi ilə Naxçıvanda atıldığına diqqət çəkən diplomat Ulu Öndərin rəhbərliyi ilə Naxçıvan Muxtar Respublikasının adından “sovet” və “sosialist” sözlərinin çıxarıldığını, üçrəngli dövlət bayrağımızın ilk dəfə məhz Naxçıvanda dövlət bayrağımız kimi qəbul olunduğunu, Dünya Azərbaycanlılarının Həmrəylik Gününün təsis edildiyini, 20 Yanvar faciəsinə siyasi qiymət verildiyini, muxtar respublikadan sovet qoşunlarının çıxarıldığını qeyd edib.
Ulu Öndərin əsasını qoyduğu strategiyanın bu gün onun davamçısı, Azərbaycan Prezidenti İlham Əliyev tərəfindən layiqincə davam etdirildiyini vurğulayıb. Müasir Azərbaycanın bünövrəsinin Ulu Öndər tərəfindən “Əsrin müqaviləsi” ilə qoyulduğunu, bu gün yeni layihələrlə daha da inkişaf etdirildiyini, Azərbaycanın qazandığı uğurların Prezident İlham Əliyevin əzmkar, məqsədyönlü və uzaqgörən siyasəti nəticəsində əldə edildiyini bildirib. Prezident İlham Əliyevin Azərbaycan Silahlı Qüvvələrinin Ali Baş Komandanı olaraq 2020-ci ilin payızında böyük Zəfərə imza atdığını, 30 ilə yaxın davam edən Ermənistan-Azərbaycan münaqişəsinin Ermənistan silahlı qüvvələrinin işğal olunmuş torpaqlarımızdan çıxarılması ilə bağlı BMT-nin məlum qətnamələrinə uyğun şəkildə reallaşdırdığını və torpaqlarımızın azad edildiyini vurğulayıb. Münaqişə və onun tarixi, İkinci Qarabağ müharibəsi başlayanadək Ermənistan tərəfindən Azərbaycan sərhədində törədilən təxribatlar barədə məlumat verib. Dünya media nümayəndələrinin, siyasətçilərin, deputatların, beynəlxalq təşkilatların təmsilçilərinin işğaldan azad olunan torpaqlarımızda ermənilər tərəfindən törədilmiş mədəni, ekoloji qətliamlarla canlı şahidləri olduğunu söyləyib. Eyni zamanda, vaxtilə Ermənistanın işğalı altında olan ərazilərimizin ermənilər tərəfindən minalandığını, onların təmizlənməsi üçün bütün çağırışlara baxmayaraq, Ermənistan dövlətinin həmin ərazilərin xəritəsini təqdim etmədiyini bildirib. Qeyd edib ki, həmin ərazilər bir çox mülki Azərbaycan vətəndaşı ilə yanaşı, hərbçilərimizin də həyatına son qoyub və ya onları əlil edib.
C.Mirzəyev, həmçinin İkinci Qarabağ müharibəsi zamanı İndoneziyanın ölkəmizin haqlı mübarizəsinə istər beynəlxalq təşkilatlar, istərsə də ikitərəfli əsasda dəstək verdiyini, həmrəylik nümayiş etdirdiyini məmnunluqla xatırladıb. İndoneziyanın Azərbaycana yeni təyin olunan səfiri H.Həmidin etimadnaməsini təqdim edərkən ölkələrimiz arasında münasibətlərə yüksək siyasi qiymət verdiyini, Azərbaycanın azad olunmuş torpaqlarında həyata keçirilən yenidənqurma işlərinə indoneziyalı investorları da dəvət etdiyini deyib.
Tədbirdə Pobi İravan (Warta Pena News), Rifa Berliana Arifin (Miraj Xəbər Agentliyi), Fergi Nadira (“Respublika” qəzeti), Desy Selviani (Wartakota onlayn xəbər portalı), Fina Nadilah (CNN TV-nin İndoneziya bürosu), Kani Dwiharyani (Tv One), Haris Sunandar (Gpriorty internet xəbər portalı), Nur Habibie (merdeka.com xəbər portalı), Retno Mandasari (Radio Republic of İndonesia) kimi indoneziyalı tanınmış jurnalistlər iştirak ediblər.
Mərasimin rəsmi hissəsindən sonra Cakartada yerləşən “Platoran” restoranında mətbuat nümayəndələri üçün müsəlmanların müqəddəs ayı olan Ramazan münasibətilə iftar süfrəsi açılıb, Ulu Öndərin ruhuna dualar oxunub, xatirəsi yad edilib.
Vüqar Ağayev
AZƏRTAC-ın xüsusi müxbiri
Cakarta
Bölmənin digər xəbərləri
