UNESCO-nun sessiyasında Azərbaycan mədəni özünüifadə müxtəlifliyindən danışılıb
Paris, 2 fevral, AZƏRTAC
İşğaldan azad olunmuş torpaqlarımızda bəşəri mədəniyyətin ayrılmaz hissəsi olan mədəni irsimizi bərpa edəcəyik. Tarixi, incəsənəti, maddi-mədəniyyət abidələri, əsrarəngiz təbiəti, iqlimi, təbii sərvətləri ilə zəngin olan işğaldan azad edilmiş torpaqlarımızda yaxın gələcəkdə müasir və yenilikçi inkişaf mərkəzləri və yaradıcılıq institutlarının təməli qoyulacaq.
AZƏRTAC xəbər verir ki, bu fikri ölkəmizin UNESCO yanında Daimi Nümayəndəliyinin rəhbəri, səfir Elman Abdullayev qurumun Mədəni Özünüifadə Müxtəlifliyinin Təşviqi haqqında 2005-ci il Konvensiyasının Hökumətlərarası Komitəsinin 14-cü sessiyasının açılışında səsləndirib.
Səfir Elman Abdullayev 2005-ci il Konvensiyasının mədəni özünüifadə müxtəlifliyinin qorunması və təşviqi istiqamətindəki rolundan, Azərbaycanda inkişaf etdirilən kreativ sənayedən, inklüziv cəmiyyəti inkişaf etdirmək məqsədilə yaradıcılığın təşviqi istiqamətində görülən işlərdən, eyni zamanda hamı üçün zəngin mədəni özünüifadə sahəsində bərabərhüquqlu fürsətlərin təmin edilməsindən danışıb.
Bildirib ki, COVID-19 pandemiyası səbəbindən UNESCO-nun Dünya İrs Siyahısında olan abidələrinin 80 faiz, habelə bir çox mədəni institutların bağlandığı dövrdə, sosial şəbəkələrdə yaradıcı sənayenin əsas mütəxəssisləri və müxtəlif sənət adamları ilə aparılmış qlobal müzakirələri ehtiva edən UNESCO-nun ResiliArt Hərəkatı yaradıcı sənayelərin mövcud vəziyyətini işıqlandırıb.
Azərbaycanın Mədəniyyət Nazirliyinin və “Kreativ Azərbaycan” portalının sənət nümayəndələrini bu təşəbbüsə qoşulmağa dəvət etdiyini bildirən E.Abdullayev, bu günə kimi ölkəmizdə 21 yeni layihə, kampaniya və müsabiqənin keçirildiyini diqqətə çatdırıb. Qeyd edib ki, tarixi, incəsənəti, maddi-mədəniyyət abidələri, əsrarəngiz təbiəti, iqlimi, təbii sərvətləri ilə zəngin olan işğaldan azad edilmiş torpaqlarımızda yaxın gələcəkdə müasir və yenilikçi inkişaf mərkəzləri və yaradıcılıq institutlarının təməli qoyulacaq.
“Azərbaycan işğal olunmuş əraziləri azad etdikdən sonra beynəlxalq ictimaiyyət Ermənistan tərəfindən bir çox tarixi və mədəniyyət abidələrinin kütləvi şəkildə məhv edilməsinin şahidi oldu. Azərbaycan hazırda azad edilmiş ərazilərdəki abidələrin bərpası üçün yol xəritəsi hazırlayır. Universal mədəniyyətin ayrılmaz hissəsi olan mədəni irsimizi bərpa etmək üçün bütün səylərimizi səfərbər edəcəyik. Bənzərsiz mədəni irsimiz kimliyimizi əks etdirir”, - deyə E.Abdullayev vurğulayıb.
Azərbaycanın Birinci vitse-prezidenti, UNESCO-nun xoşməramlı səfiri Mehriban Əliyevanın töhfələri sayəsində yüksək səviyyəyə çatmış Azərbaycan-UNESCO münasibətlərinə toxunan daimi nümayəndə, 2022-ci ildə UNESCO-ya üzvlüyümüzün 30 illik yubileyindən, müstəqilliyimizi bərpa etdikdən sonra bu təşkilat ilə xüsusilə mədəni müxtəliflik və mədəniyyətlərarası dialoq sahəsindəki sıx əməkdaşlıqdan və 2005-ci il Konvensiyasının müddəalarına uyğun olaraq, tarix boyu Azərbaycanda yaşayan müxtəlif millətlərin nümayəndələrinin mədəniyyət, incəsənət, adət-ənənələr və dillərinin qorunmasından söz açıb.
Qeyd edək ki, sessiyanın açılışında Dayanıqlı İnkişaf üçün Yaradıcı İqtisadiyyat İlinin başlanılması ilə əlaqədar UNESCO-nun Baş direktoru Odri Azuleyin, BMT Baş Assambleyasının 75-ci sessiyasının prezidenti Volkan Bozkırın, Kolumbiyanın Prezidenti İvan Dükenin, habelə Dünya Bankının və Ticarət və İnkişaf üzrə BMT Konfransının nümayəndələrinin videomesajları da dinlənilib. Sessiyanın gündəliyi, müşahidəçilərin siyahısı təsdiqlənib, komitənin on üçüncü iclasının ətraflı icmalı qəbul edilib və qurumun Katibliyinin 2020-ci il ərzində həyata keçirdiyi fəaliyyətin hesabatı dinlənilib.
Ölkəmizin vitse-prezidenti olduğu UNESCO-nun Mədəni Özünüifadə Müxtəlifliyinin Təşviqi haqqında 2005-ci il Konvensiyasının Hökumətlərarası Komitəsinin 14-cü sessiyası fevralın 6-dək öz işini davam etdirəcək.
Azərbaycan sessiyada Mədəniyyət Nazirliyinin və Daimi Nümayəndəliyin nümayəndələri ilə təmsil olunur.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
