UNİBANK “BRİLYANT DEPOZİTİ” LOTOREYA AKSİYASINI TƏQDİM ETMİŞDİR
Unibank “Brilyant depoziti” yeni lotoreya aksiyasını təqdim etmişdir.
Oyunun şərtlərinə görə, bankın əmanətçiləri il ərzində hər ay 3 brilyant udmaq şansı əldə edirlər. Hər 1000 manat/dollar/avro qələbə üçün bir şans sayılır. Əmanətin məbləği çox olduğu halda, brilyantları udmaq şansı da artır
Bankdan AZƏRTAC-ın müxbirinə bildirmişlər ki, aksiya bu ilin aprelindən 2009-cu ilin martınadək davam edəcəkdir. Unibankın aksiyası çərçivəsində 11 ay müddətində hər ay 0,3 karatlıq 3 brilyant oynanılacaqdır. Lotoreyanın 2009-cu ilin martında keçiriləcək 12-ci final oyunu Novruz bayramına həsr ediləcəkdir. Onun qalibi hər biri 1 karat olan 3 brilyant udacaqdır. Bütün brilyantların keyfiyyət parametrləri, o cümlədən çəkisi, rəngi, xalisliyi və cilalanma keyfiyyəti göstərilməklə, müvafiq sertifikatları olacaqdır. Oyunda bankın aksiyadan əvvəl və aksiyanın gedişi zamanı depozit qoymuş əmanətçiləri iştirak edəcəklər.
Qaliblər müstəqil müşahidəçilərin nəzarəti altında təsadüfi kompyuter seçimi üsulu ilə müəyyən olunacaqdır. Lotoreya oyunundan sonra üç gün ərzində onlara məlumat veriləcəkdir. Növbəti lotoreya oyununun başa çatması barədə bildiriş kütləvi informasiya vasitələrində dərc olunacaqdır.
