UNİBANK FİLİAL ŞƏBƏKƏSİNİ GENİŞLƏNDİRİR
Unibank Şəmkir şəhərinin 20 Yanvar küçəsində dördüncü regional filialını açmışdır.
Bankdan AZƏRTAC-a bildirmişlər ki, “Şəmkir” filialı müştərilərə geniş çeşiddə bank xidmətləri təklif edir: əhalidən və korporotiv müştərilərdən depozitlərin qəbul edilməsi, istehlakçıların maliyyələşdirilməsi və mikromaliyyələşdirmə, biznes-kreditləşdirmə, pul köçürmələri, plastik kartlarla xidmətlər və s.
Unibankın idarə heyətinin sədri Faiq Hüseynov demişdir: “Hazırda Azərbaycanın maliyyə bazarı qarşımıza əhalini yeni bank məhsulları və xidmətləri ilə tanış etmək vəzifəsi qoyur. Bank məhsulları - sadədən tutmuş ən mürəkkəbədək - ölkənin istənilən vətəndaşının həyatında gündəlik vasitəyə çevrilmişdir. Müştəriyə yaxın, onun üçün əlçatan, əlverişli və rahat olmaq bizim üçün çox vacibdir. Ona görə də Unibankın əsas strateji məqsədlərindən biri hazırda filial bazasını genişləndirmək və müştəriyə maksimum yaxın olmaqdır”.
İlin əvvəlindən Unibank 9 filial açmışdır. Filiallardan 7-si paytaxtda, 2-si isə Şəki və Şəmkir şəhərlərində yaradılmışdır.
Hazırda bankın paytaxtda 16, regionlarda 4 filialı vardır.
Unibank Quba, Lənkəran, Qəbələ, Bərdə, Mingəçevir və Xırdalanda da fəaliyyətini genişləndirməyi, həmin şəhərlərdə yeni filiallar açmağı planlaşdırır.
Azərbaycanın ən böyük özəl banklarından biri olan Unibank maliyyə göstəricilərinə görə 3 lider bank sırasındadır. Onun nizamnamə fondu 15 milyon manat, ümumi kapitalı isə 36,5 milyon manatdan çoxdur. Ötən ilin yekunlarına əsasən, bankın aktivləri 390 milyon manat təşkil etmiş, kredit portfeli isə 270 milyon manatı ötmüşdür. Bankın rəsmi auditoru “PricewaterhouseCoopers” şirkətidir. Bankın səhmdarları sırasına Avropa Yenidənqurma və İnkişaf Bankı (AYİB) və DEG Almaniya İnvestisiya Korporasiyası daxildirlər.
