UŞAQ SAĞLAMLIQ MƏRKƏZİNİN HƏKİMİ GÜLNARƏ HƏNİSAYEVANIN ÇIXIŞI
Bu gün lənkəranlıların sevincinin həddi-hüdudu yoxdur. İlk dəfə olaraq şəhərimizdə dünya səviyyəli səhiyyə ocağı istifadəyə verilir.
Təkcə Lənkəranda deyil, ətraf rayonlarda yaşayan xəstələr də çoxdan belə bir müalicə mərkəzinin həsrətində idilər. Bu əlamətdar hadisəni biz çoxdan gözləyirdik.
Cənab Prezident, çox sağ olun ki, şəhərimizdə belə bir müalicə ocağının tikilməsinə göstəriş verdiniz.
Həkimlər nə qədər bilikli, bacarıqlı olsalar da, imkanlarımızın zəifliyi xəstələri vaxtında və keyfiyyətlə sağaltmağa çətinlik törədir. İndi istifadəyə verilən müalicə-diaqnostika mərkəzi ən ağır xəstələrə belə şəfa verməyə imkan yaradır. Biz həkimlər Sizə hədsiz minnətdarıq. Bölgəmizdə ağır böyrək xəstəliyinə tutulmuş yüzlərlə insan vardır. Onların yeganə müalicə üsulu hemodializdir. Hemodializ mərkəzləri ancaq Bakı şəhərində olduğu üçün xəstələrimiz çox böyük problemlərlə rastlaşırdılar. Bu mərkəzdə qurulmuş ən müasir tibb avadanlığı ağır xəstəliyə tutulmuş insanlara şəfa verəcəkdir. Burada, kompyuter tomoqrafiyası, exokardioqrafiya, veloerqometrik müayinələr aparılacaqdır. Bu mərkəzdə analoqu olmayan cərrahiyyə, reanimasiya şöbələri vardır. Əməliyyatdan sonrakı xəstələr üçün Avropa standartlarına uyğun şərait yaradılmışdır. Bu, xəstələrimizə daha keyfiyyətli tibbi xidmət göstərməyə şərait yaradır.
Ulu öndərimiz demişdir: “Həkimlər mənim dostumdur, mən dünyada elə bir sənət tanımıram ki, o, həkimlik sənəti qədər insanlara lazımlı olsun”. Hazırda Lənkəran rayonunda istifadədə olan tibb müəssisələri ulu öndərimizin respublikamıza başçılıq etdiyi dövrdə tikilmişdir.
Biz bilirik ki, Sizin tapşırığınızla respublikamızda 10-a yaxın belə mərkəz tikilməlidir. Onun birincisinin məhz Lənkəranda tikilməsi bizə olan qayğınızın təzahürüdür. Burada müasir cərrahiyyə və reanimasiya şöbələrinin yaradılması isə məhz Sizin təkid və tələbiniz nəticəsində mümkün olmuşdur.
2004-cü ildə yaşayış evində baş vermiş qəza zamanı Sizin yaralı insanlara baş çəkməyiniz bugünkü kimi yadımızdadır. Elə onda da, indi də Siz bir daha sübut etdiniz ki, həqiqətən, hər bir Azərbaycan vətəndaşının Prezidentisiniz.
Heydər Əliyev Fondunun Prezidenti, YUNESKO-nun xoşməramlı səfiri, bizim hamımızın sevimlisi Mehriban xanım Əliyeva da təhsilə və səhiyyəyə böyük diqqət göstərir. Biz ona da öz dərin minnətdarlığımızı bildiririk.
Biz fəxr edirik ki, ulu öndər, ümummilli liderimiz Heydər Əliyev ideyalarını müvəffəqiyyətlə həyata keçirən Prezidentimiz var.
Möhtərəm cənab Prezident, biz səhiyyə işçiləri söz veririk ki, bundan sonra xalqımızın sağlamlığı yolunda daha səylə çalışacağıq.
Bir daha Sizə öz minnətdarlığımızı bildirir, möhkəm cansağlığı, Vətənimizin inkişafı naminə gördüyünüz işlərdə yeni-yeni müvəffəqiyyətlər arzu edirik.
X X X
Prezident İlham Əliyev mərasimdə nitq söylədi.
X X X
Prezident İlham Əliyev mərasimdən sonra yerli sakinlərlə səmimi görüşüb hal-əhval tutdu, onların problemləri ilə maraqlandı.
Lənkəran Dövlət Universitetinin müəllimi MİRHƏŞİM TALIŞLI dövlətimizin başçısına müraciətlə dedi:
-Çox əziz və hörmətli Prezidentimiz İlham Əliyev!
Dünya şöhrətli liderimiz Heydər Əliyevin qarşısında 1998-ci il oktyabrın 5-də oxuduğum şeirə görə onun mənim haqqımda dediyi xoş sözlərin təsiri qəlbimdə əbədi və fərəhli iz salmışdır. İlk misraları xatırlayıram:
Sənin qüdrətinə söz demək üçün,
Sözə ilahidən qüdrət gərəkdir!
Doğrudan da, mən o böyük liderimizin misilsiz zəhmətləri, dar günündə xalqımızı, Vətənimizi, respublikamızı təhlükələrdən xilas edən dahi insanın qarşısında söz deməyə cəsarət etdiyim üçün Ulu Tanrıdan sözlərimə bir qüvvət arzulamışdım. Dahi şəxsiyyətin ləyaqətli davamçısı olan, əbədi Prezident hesab etdiyim İlham Əliyevin, Heydər Əliyev Fondunun, Azərbaycan Mədəniyyətinin Dostları Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevanın qarşısında söz demək üçün bu gün də Ulu Tanrıdan bir hünər arzu edirəm.
Bu gün Lənkəranımız son dərəcədə abadlaşır, gözəlləşir, gülüstana çevrilir. Şəhər, qəsəbə və kəndlərimizin hər tərəfində böyük abadlıq işləri aparılır. Bütün bunlara görə lənkəranlılar və Lənkəran Dövlət Universitetinin professor-müəllim heyəti adından dərin razılığımı bildirirəm. Qoy, Ulu Tanrı Sizə işlərinizdə kömək olsun, hər işiniz, xüsusən siyasi fəaliyyətiniz müvəffəqiyyətlə nəticələnsin. Gün o gün olsun ki, Qarabağ torpağında qələbə bayramına yığışaq. Qoy, ulu Tanrı həmişə Sizdən razı qalsın.
Bölmənin digər xəbərləri
