Uşaqlarda hərarəti salmaq lazımdırmı?
Bakı, 6 dekabr, AZƏRTAC
Uşağın hərarəti yüksələndə böyüklər qorxuya düşür və ona qızdırma salan dərman verməyə tələsirlər. Hərarət adətən virus infeksiyası fonunda yüksəlir. Xəstəlik çox vaxt məhz bədənin hərarətinin artması ilə başlayır, digər əlamətlər bir qədər sonra üzə çıxır. Əslində, hərarət yaxşı əlamətdir. AZƏRTAC Rusiya KİV-lərinə istinadla xəbər verir ki, hərarətin yüksəlməsi orqanizmin infeksiya ilə mübarizəyə başladığını, yüksək hərarət isə orqanizmin bunun öhdəsindən yaxşı gəldiyini göstərir.
Hərarət orqanizmin xəstəliyə reaksiyasıdır və immunitetin sağlam olmasına dəlalət edir, yəni qorxmaq əvəzinə sevinmək lazımdır. Hərarətin süni şəkildə salınması orqanizmin müdafiəsini zəiflədə bilər, buna görə də çiddi səbəb olmadan, yəni termometrin göstəricisi 38,5 dərəcəni keşmədikdə, dərman verməyə ehtiyac yoxdur.
Əvvəlcə uşağı soyundurmaq lazımdır (temperatur bəzən sadəcə uşağın əynində çox paltar olması səbəbindən 1-2 dərəcə yüksəlir). Söhbət südəmər körpədən gedirsə, əynindəki pampersi çıxarmalısınız, çünki pampers ilə yüksək temperatur bir araya sığmır.
İlıq suya 9 faizlik sirkə əlavə edib (1 litr suya 1 xörək qaşığı), bu məhlulla bədəni ovxalamaq olar. Yaxşı olar, əvvəlcə uşağı başını da yumaqla on dəqiqə çimizdirib, sonra bədənini qurulamadan mələfəyə və ya qətfəyə büküb havası dəyişdirilmiş otağa gətirəsiniz. Lakin su prosedurları və ovxalama zamanı suyun temperaturu bədənin hərarətindən 1 dərəcədən çox aşağı olmamalıdır, əks halda güclü kontrast damarlarda spazma əmələ gətirir. Diqqət! Uşaq qızdırma içərisində titrəyirsə, onu nə çimizdirmək, nə də ovxalamaq olar.
Uşaq qızdıranda maye rejimi gözlənilməlidir. Südəmər uşaqları əmizdirmək, nisbətən böyük uşaqlara azacıq turş su içizdirmək, habelə təbii tərlədici vasitələr: bal əlavə edilmiş cökə və ya moruq çayı vermək lazımdır. Tərləmə də hərarəti salır. Tərləmiş uşağı qurulamaq yox, paltarını dəyişdirmək lazımdır.
Qızdırma salan preparatlara ehtiyac yaranıbsa, uşaqlara parasetamol və ibuprofen kimi preparatlar verilməlidir. Yaşlılar üçün dərman vasitələri ziyan verə bilər. Dünya Səhiyyə Təşkilatının uşaqlara verilməsini ümumiyyətlə qadağan etdiyi aspirin xüsusilə təhlükəlidir.
Nadir hallarda, adətən qızdırma salan dərmanlar kömək etməyəndə, “təcili yardım” çağırmaq lazım gəlir. Həkim briqadası uşağa analqin-papaverin-dimedrol qatışığından ibarət iynə vurur. Əlbəttə, bu, son çarədir.
Özünü müalicə edən insanlar arasında lazım gəldi-gəlmədi antibiotiklərdən qızdırma salan vasitə kimi istifadə etməyə meyilli adamlar var. Belələri həkimlər arasında da az deyil. Bu, yanlış təsəvvürdür, çünki antibiotiklər üçün xüsusi göstəricilər var və bədənin hərarətinin yüksəlməsi həmin göstəricilərə daxil deyil.
Antibiotiklər bakterial infeksiyaların müalicəsi üçün nəzərdə tutulub. Viruslu xəstəliklərdə onlar nəinki faydasızdır, hətta zərərlidir.
Bölmənin digər xəbərləri
