ÜZƏRİNDƏ ULU ÖNDƏR HEYDƏR ƏLİYEVİN ŞƏKLİ OLAN HAVA GƏMİSİ SƏMAYA BURAXILMIŞDIR
AZƏRTAC xəbər verir ki, mayın 3-də xalqımızın ümummilli lideri Heydər Əliyevin anadan olmasının 85 illik yubileyi ilə əlaqədar hazırlanmış Aerostat havaya buraxılmışdır.
Könüllü Hərbi Vətənpərvərlik Texniki İdman Cəmiyyəti (KHVTİC) Respublika Şurasının təşəbüsü ilə hazırlanmış belə hava gəmisi Azərbaycanda ilk dəfədir ki, havaya buraxılır.
Hündürlüyü 35, eni 25 metr, ümumi çəkisi isə 250 kiloqramdan çox olan hava gəmisi Moskvada Hava Uçuşu Federasiyasında hazırlanmışdır. O, 20 dəqiqə ərzində uçuşa hazır vəziyyətə gətirilə bilir.
KHVTİC Respublika Şurasının sədri polkovnik Novruzəli Orucov bildirmişdir ki, bu hava gəmisi xalqımızın ümummilli lideri Heydər Əliyevin anadan olmasının 85 illik yubileyinə həsr olunmuşdur. Gəminin üzərində ulu öndərin uzunluğu 11, eni isə 4 metr olan şəkli vurulmuşdur. Gəminin hazırlanmasının digər bir məqsədi isə Azərbaycanda bu idman növünün inkişaf etdirilməsidir.
Xatırladaq ki, hava gəmisi mayın 10-da keçirilən tədbirdə yenidən havaya qaldırılacaqdır.
######
