VII ÜMUMRESPUBLİKA DAXİLİ TURİZM KONFRANSI KEÇİRİLMİŞDİR
AZƏRTAC xəbər verir ki, sentyabrın 27-də “Ramada” mehmanxanasında Dünya Turizm Günü münasibətilə VII ümumrespublika daxili turizm konfransı keçirilmişdir.
Mədəniyyət və turizm nazirinin müavini Teymur Mehdiyev konfransı açaraq bildirmişdir ki, turizm ölkənin sosial-iqtisadi, mədəni həyatına təsir göstərən çox vacib bir amildir. Azərbaycanın böyük turizm potensialı olduğunu vurğulayan natiq bu sahənin inkişaf etdirilməsi istiqamətində nazirlik tərəfindən görülən işlər barədə məlumat vermişdir.
Mədəniyyət və turizm naziri Əbülfəs Qarayev müasir dövrdə dövlət büdcəsinə gəlirlərin artırılması, iqtisadiyyatın inkişaf etdirilməsi, əhalinin sosial-iqtisadi vəziyyətinin yüksəldilməsində turizmin rolundan danışmışdır. Nazir bildirmişdir ölkəmizdə hər sahədə olduğu kimi, turizm sahəsində də sürətli inkişaf müşahidə olunur. Belə ki, ölkəmizə gələn xarici turistlərin sayı hər il artmaqdadır. Təkcə ötən il turizm sahəsindən 177,8 milyon dollar gəlir əldə edilmişdir.
Azərbaycan Turizm İnstitutunun rektoru Cəfər Cəfərov institutun fəaliyyəti haqqında məlumat verərək bildirmişdir ki, ölkəmizdə turizm sahəsinin inkişaf etdirilməsində, ixtisaslı kadrların yetişdirilməsi və beynəlxalq əlaqələrin qurulması zəruridir.
Tədbirdə ölkədə fəaliyyət göstərən 196 turizm obyekti arasında aparılan sorğunun nəticələri diqqətə çatdırılmışdır.
Eyni zamanda, ölkədə fəaliyyət göstərən turizm şirkətləri və mehmanxanaların fəaliyyəti, turizm xidməti sahəsində mövcud olan problemlər və bu işin müasir standartlara uyğunlaşdırılması məsələsi müzakirə olunmuşdur.
Sonda turizm sahəsində fəaliyyəti ilə fərqlənən şirkətlərə mehmanxanalara lisenziya və sertifikatlar təqdim olunmuşdur.
Bölmənin digər xəbərləri
