Viktor Orban: Ukrayna üçün Aİ-yə qoşulmaq hələ tezdir
Budapeşt, 26 aprel, AZƏRTAC
“Ukrayna üçün Avropa İttifaqına (Aİ) qoşulmaq hələ tezdir”.
AZƏRTAC xəbər verir ki, bu sözləri Macarıstanın Baş naziri Viktor Orban “Sabahın xeyir, Macarıstan” televiziya proqramında çıxışında deyib. Onun sözlərinə görə, Brüssel Ukraynanı israrla ümumavropa dövlətlər ailəsinə sürükləmək istəyir.
“Avropa Komissiyasının sədri Ursula Fon der Lyayen Avropa Parlamentində bildirib ki, Ukraynanı 2030-cu ilə qədər Aİ-də görmək istəyir. Bu, artıq bizim qapımızın zənginin çalındığı deməkdir. Ola bilsin ki, 20, 30, 40 ildən sonra Ukrayna qoşulmaq üçün həqiqətən də lazım olan şərtləri yerinə yetirə biləcək və eyni zamanda da Macarıstanın iqtisadiyyatını məhv etməyəcək. Lakin bu, yaxın gələcəkdə baş verməyəcək. Ukraynanın Aİ-yə üzvlük məsələsi bütün Avropa İttifaqı üçün yaxın altı ayda ən mürəkkəb və ən böyük döyüş olacaq”, - deyə hökumət başçısı bildirib.
Onun fikrincə, bu məsələ Macarıstanın yaxın 15-20 ildə gələcəyini də müəyyən edəcək.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
