Yaxın günlərdə Vişnevskaya-Rostropoviç Fondu Azərbaycan Səhiyyə Nazirliyi ilə birlikdə 1-6 yaşlı uşaqların qızılca, məxmərək və parotit xəstəliklərinə qarşı kütləvi surətdə vaksinləşdirilməsinə başlayacaqdır. Fondun Bakı nümayəndəliyindən
AZƏRTAC-ın müxbirinə bildirmişlər ki, iyunun 1-dən etibarən vaksinləşdirmə təcrübi layihə kimi yalnız Bakıda həyata keçirilirdi. İndi isə ölkənin bütün ərazisində aparılacaqdır. Bu tədbiri ABŞ hökumətinin və Kənd Təsərrüfatı Departamentinin Fond üçün ayırdığı üçillik xeyriyyə qrantı hesabına gerçəkləşdirmək mümkün olmuşdur. Ümumilikdə, 300 mindən çox uşağa vaksin vurulması nəzərdə tutulmuşdur.
Daha çox yayılmış yoluxucu xəstəliklərə qarşı ən müasir və səmərəli vasitə olan vaksindən savayı, Fond Azərbaycana soyuducular, termokonteynerlər və generatorlar da gətirəcəkdir. Tibb işçiləri üçün keçiriləcək seminarlarda isə vaksinlərin düzgün saxlanma və istifadə metodları, habelə istifadə olunmuş şprislərin təhlükəsiz məhv edilməsi qaydaları izah olunacaqdır.
